महिलेच्या गुप्तांगात मिरची पुड टाकुन अमानुष मारहाण  

सामना प्रतिनिधी । हिंगोली

सेनगाव तालुक्यातील जयपुर येथे ५० वर्षीय महिलेला लाकडी दांड्याने चौघांनी अमानुष मारहाण करत गुप्तांगामध्ये मिरचीची पुड टाकल्याचा भयंकर प्रकार घडला आहे. याप्रकरणी चार जणांविरुध्द गुन्हा नोंदवण्यात आला आहे. मारहाणीत गंभीर जखमी झालेल्या महिलेवर हिंगोलीच्या जिल्हा शासकीय रुग्णालयात उपचार सुरु आहेत.

याबाबत पोलीस सुत्रांनी दिलेली माहिती अशी की, जयपुर गावातील संतोष विठ्ठल पंडीत, विकास वामन पंडीत, वामन महादु पंडीत, विठ्ठल महादु पंडीत या चौघांनी गावातीलच घरकाम व मजुरी करणार्‍या एका ५० वर्षीय महिलेच्या घरामध्ये ४ डिसेंबर रोजी सकाळी साडे दहा वाजता प्रवेश केला. तसेच क्षुल्लक कारणावरून तु माजली आहेस असे म्हणत अश्लील भाषेत शिवीगाळ करुन मिरचीची पुड महिलेच्या अंगावर तसेच गुप्तांगात टाकल्याचे पोलीसांनी सांगितले. लाकडी दांडक्याने या महिलेला बेदम मारहाण करुन गंभीर जखमी करण्यात आले आहे. तसेच जीवे मारण्याचीही धमकी देण्यात आली. दरम्यान, या पिडीतेवर हिंगोलीच्या जिल्हा शासकीय रुग्णालयामध्ये उपचार सुरु आहेत. या प्रकरणातील आरोपींना अद्याप अटक झाली नसल्याचे सांगण्यात आले.