भन्नाट ऑफर… पेट्रोल-डिझेलच्या खरेदीवर बाईक, लॅपटॉप ‘फ्री’

सामना ऑनलाईन । भोपाळ

इंधन तेलाचे दर कमी करणे हे केंद्र सरकारच्या हातात नाही, असे स्पष्टीकरण देत केंद्र सरकारने जनतेला कोणताही दिलासा देण्यास नकार दिलेला असतानाच मध्य प्रदेशातील बारवानी भागातील पेट्रोल पंपांच्या मालकांनी मात्र ग्राहकांना मोठा दिलासा देण्याचा प्रयत्न केला आहे. पेट्रोल आणि डिझेल भरल्यास ग्राहकांना मोटारसायकल, लॅपटॉप, एसी आणि वाशिंग मशीन मोफत देण्याची ‘ऑफर’च त्यांनी दिली आहे. या नव्या ऑफरमुळे पेट्रोल पंपावर मोठी गर्दी पाहायला मिळत आहे.

मध्य प्रदेशात पेट्रोल-डिझेलचे दर जास्त असल्याने राज्यातील ट्रक चालक, टेम्पो आणि जड वाहनधारक तसेच सीमावर्ती भागातील अनेक जण दुसऱ्या राज्यात जावून वाहनांमध्ये पेट्रोल-डिझेल भरत आहेत. हा प्रकार पेट्रोल पंप मालकांच्या लक्षात आल्यानंतर त्यांनी ग्राहकांना आपल्याकडे खेचण्यासाठी विविध क्लृप्त्या वापरायला सुरुवात केली आहे. शंभर लिटर डिझेल भरल्यानंतर ग्राहकांना मोफत चहा आणि नाश्ता दिला जात आहे. 5 हजार लिटर डिझेल खरेदी केल्यानंतर मोबाईल, सायकल किंवा मनगटी घड्याळ मोफत दिलं जात आहे. तर 15 हजार लिटर डिझेल खरेदीवर कपाट, सोफा सेट किंवा शंभर ग्रॅमच्या चांदीचे नाणे दिले जात आहे. 25 हजार लिटर डिझेल खरेदी केल्यावर वॉशिंग मशीन तर 50 हजार लिटर खरेदीनंतर एसी आणि 1 लाख लिटर खरेदी केल्यानंतर स्कूटर किंवा मोटारसायकल पेट्रोल पंप मालकांकडून मोफत दिली जात आहे. दरम्यान, मध्य प्रदेशात डिझेलवर 22 टक्के तर पेट्रोलवर 27 टक्के व्हॅट लावला जात असल्याचे पेट्रोल पंप मालकांनी सांगितले.