डोंबिवलीत शुक्रवारपासून चमचमीत मिसळ महोत्सव; खवय्यांना चमचमीत, झणझणीत ‘तर्रीदार’ मेजवानी

मिसळ आणि मराठी माणूस यांचे अतूट नाते. हे नाते आता आणखी घट्ट होणार आहे. डोंबिवलीच्या सावळाराम महाराज क्रीडा संकुलात शुक्रवार 29 एप्रिल ते 1 मे या दरम्यान चमचमीत मिसळ महोत्सव होणार आहे. भाऊ चौधरी फाऊंडेशन, शिवसेना व युवा सेनेच्या वतीने हा उपक्रम -आयोजित केला असून खवय्यांना यानिमित्ताने तेज-तर्रीदार अनुभव घेता येणार आहे. या महोत्सवात नादखुळा, स्वाद, माऊली, राजेशाही, विद्याश्री अशा विविध प्रकारच्या मिसळीचा आस्वाद डोंबिवलीकरांना चाखता येईल.

कोकण, पश्चिम महाराष्ट्र, विदर्भ, मराठवाडा अशा विविध भागांमध्ये भाषा आणि खाद्य संस्कृती ही वेगवेगळी आहे. पदार्थ एकच असला तरी बनवण्याची पद्धतदेखील स्वतंत्र. त्यात मिसळही अपवाद नाही. डोंबिवलीत होणाऱ्या मिसळ महोत्सवात कोल्हापूर, सांगली, कणकवली, जुन्नर, कल्याण, पारनेर, देहू अशा विविध भागातील मिसळींची चव एकाच ठिकाणी घेता येईल. या महोत्सवाच्या निमित्ताने महाराष्ट्रातील खाद्य संस्कृती व परंपरेचा अनोखा संगम होणार आहे.

लकी ड्रॉ द्वारे पैठणी जिंका

मिसळ महोत्सवाची सध्या जोरात तयारी सुरू असून अभिषेक चौधरी, ललित शाईवाले, प्रकाश तेलगोटे, विशाल पवार, संतोष कोर्डे हे युवक आयोजक मेहनत घेत आहेत. या महोत्सवामध्ये कोल्हापूरची चवदार मिसळ, सांगलीची खवा मिसळ, कणकवलीची आचरेकर मिसळ तसेच देहूची विद्याश्री मिसळ हे प्रमुख आकर्षण ठरणार आहे. ‘उत्सव महाराष्ट्राचा.. खाद्य संस्कृती’ चा ही या महोत्सवाची टॅगलाईन आहे. येवल्याची प्रसिद्ध पैठणी तसेच हस्तनिर्मित कलावस्तू हे या महोत्सवाचे आकर्षण असून लकी ड्रॉ देखील काढण्यात येईल, अशी माहिती भाऊ चौधरी फाऊंडेशनच्या वतीने करण्यात आली.