आगामी लोकसभा निवडणुकीसाठी काँग्रेसने आयोजित केलेल्या 28 डिसेंबरच्या महासभेसाठी तयारी पूर्ण केली आहे. या रॅलीला पक्षाने ‘हैं तयार हम’चा नारा दिला असून या सभेसाठी काँग्रेसचे राष्ट्रीय अध्यक्ष मल्लिकार्जुन खरगे यांच्यासह सोनिया गांधी, राहुल गांधी आणि प्रियंका गांधी उपस्थित राहणार आहेत.
काँग्रेसच्या स्थापना दिनाच्या निमित्ताने ही महारॅली आयोजित करण्यात आली असून या रॅलीसाठी काँग्रेसचे मुख्यमंत्री, प्रदेशाध्यक्ष, विरोधी पक्षनेते, काँग्रेस कार्य समितीचे सदस्य यांच्यासह हजारो पदाधिकारी व लाखो काँग्रेस कार्यकर्ते या रॅलीला उपस्थित राहणार आहेत. नागपूर येथील ज्या मैदानात ही महारॅली आयोजित करण्यात आली आहे. त्याला पक्षाकडून ‘भारत जोडो मैदान’ असे नाव देण्यात आले असल्याची माहिती प्रदेशाध्यक्षा नाना पटोले यांनी दिली.
ईव्हीएमवर लोकांमध्ये संशय
ईव्हीएमवर लोकांमध्ये संशय आहे. त्याची दखल निवडणूक आयोगाने घेतली पाहिजे. लोकांना वाटते, त्यांचे मत दुसऱ्या पक्षाला जाते. त्याचा गांभिर्याने विचार झाला पाहिजे. मतदान पत्रिकेवर मतदान घ्यावे ही जर लोकांची मागणी असेल तर त्याची दखल केंद्र सरकारने व निवडणूक आयोगाने घेतली पाहिजे, अशी मागणी नाना पटोले यांनी सोमवारी केली. तर गुजरातचे मुख्यमंत्री असताना हेच नरेंद्र मोदी ईव्हीएमला विरोध करत होते याकडेही त्यांनी लक्ष वेधले.
