विरोधात असताना बेधडक वागलो; गडकरींची कबुली

नितीन गडकरी

सामना ऑनलाईन । नागपूर

सत्तेत येण्याची खात्री नव्हती म्हणून विरोधात असताना बेधडकपणे अव्यावहारिक मागण्या केल्या. आता त्याचीच झळ बसत आहे; अशी प्रांजळ कबुली केंद्रीयमंत्री नितीन गडकरी यांनी दिली. सरकारकडे पैसे नसताना कोणत्याही अयोग्य अथवा अव्यावहारिक मागण्या मान्य करू नये असेही गडकरी म्हणाले.

नागपूर शिक्षक मतदारसंघात प्रचार करतेवेळी शिक्षक सहकारी बँकेच्या सभागृहातील सभेत गडकरी बोलण्याच्या ओघात बरेच काही बोलून गेले. याआधी गडकरींनी लोकसभा निवडणुकीत दिलेले ‘अच्छे दिन’चे आश्वासन आता ‘गले की हड्डी’ झाल्याचे सांगून टाकले होते. अघळपघळ बोलण्यासाठी प्रसिद्ध असलेल्या गडकरींना अव्यावहारिक मागण्या करू नये अथवा त्यांचे समर्थनही कोणी करू नये असे सांगितले.

गडकरी सरांची ही शिकवणी सध्या राजकीय वर्तुळात चर्चेचा विषय झाली आहे.