कोंबड्याने दिलं अंडं, न्यायालयाने सुनावली जिवंत जाळण्याची शिक्षा

न्यायालयात आरोपींविरोधात खटले चालतात. सुनावणीदरम्यान दोन्ही बाजूंचे म्हणणे समजून घेऊन न्यायाधीश निकाल देतात. मात्र, काही न्यायालये अशी आहेत ज्यात चक्क प्राण्यांवर खटले दाखल झाले असून त्यांना शिक्षाही सुनावण्यात आली आहे. ‘ द क्रिमीनल प्रोसेक्युशन अ‍ॅण्ड कॅपिटल पनिशमेंट ऑफ अ‍ॅनिमल’ या के. डब्लू. हेनमन यांच्या 1906 साली लंडनमध्ये प्रसिद्ध झालेल्या पुस्तकात प्राण्यांविरोधात चालवण्यात आलेले खटले आणि त्यांना सुनावण्यात आलेल्या शिक्षांचा समावेश आहे. न्यायालयीन खटल्यांबाबत अनेक पुस्तके बाजारात येतात. मात्र, प्राण्यांवरील खटल्यांबाबत बाजारात आलेले हे एकमेव पुस्तक आहे.

एका नवजात बालकाच्या हत्येप्रकरणी 1386 मध्ये एका डुकराला दोषी ठरवण्यात आले होते. दोषी घोषित केल्यानंतर या डुकरालाफाशीची शिक्षा सुनावण्यात आली होती. कैदेत असताना या डुकराला इतर कैदी खातात तेच अन्न देण्यात आलं होतं. फासावर लटकावण्यापूर्वी डुकराला फासावर लटकावण्यात येणाऱ्या कैद्यासारखे कपडे घालण्यात आले होते.  तसेच त्याचा चेहरा काळ्या कपड्याने झाकण्यात आला होता.

5 सप्टेंबर 1379 रोजी फ्रान्समध्येच एका लहान मुलाला डुकराच्या कळपाने ठार मारलं होतं. या प्रकरणी पोलिसांनी 3 डुकरांना अटक केली होती. 3 डुकरांना अटक झाली असली तरी या गुन्ह्यात कळपातील इतर डुकरांचाही अप्रत्यक्ष सहभाग असल्याचं न्यायालयाने म्हटलं होतं. या डुकरांचा आरडाओरडा, आक्रमक हालचाली या मुख्य आरोपींनी केलेल्या कृत्याचं समर्थन करणाऱ्या वाटत होत्या असंही न्यायालयाने म्हटलं होतं.  बर्गंडीच्या ड्यूकने 3 डुकरं वगळता इतर सगळ्या डुकरांना माफी दिली होती, 3 डुकरं ही दोषी ठरवण्यात आल्यानंतर त्यांनाही फाशीची शिक्षा देण्यात आली होती.

सगळ्यात विचित्र खटला आणि शिक्षा ही स्वित्झर्लंडमध्ये पाहायला मिळाली होती. 1474 साली ‘बसेल’ या शहरातील दंडाधिकाऱ्यांच्या समूहाने एका कोंबड्याला दोषी ठरवलं होतं.  कोंबडी अंडे देते हे सगळ्यांना माहिती आहे, मात्र बसेलमधील एका कोंबड्याने अंडे दिल्याने आश्चर्य व्यक्त केलं जात होतं. कोंबडा अंडे कसं काय देऊ शकतो असं म्हणत या कोंबड्यावर खटला दाखल करण्यात आला होता.  न्यायाधीशांनी या कोंबड्याला शिक्षा देताना म्हटले होते की ‘हा गुन्हा अत्यंत घृणास्पद आणि अनैसर्गिक स्वरुपाचा आहे.’ कोंबड्याविरूद्ध सुरू असलेला हा खटला पाहण्यासाठी त्याकाळी तुफान गर्दी झाल्याचं म्हटलं आहे. न्यायालयाने अंडे दिल्याप्रकरणी कोंबड्याला जिवंत जाळण्याची शिक्षा दिली होती. कोंबड्याला जाळल्यानंतर जल्लादाने जेव्हा या कोंबड्याचं पोट फाडलं तेव्हा त्याला 3 अंडी दिसली होती असा दावा केला जातो.

लंडनमध्ये 1314 मध्ये एका पादचाऱ्यावर बैलाने हल्ला केला होता. त्यात पादचारी गंभीर जखमी झाला होता. याप्रकरणी बैलावर न्यायालयात खटला चालवण्यात येऊन त्याला फाशीची शिक्षा सुनावण्यात आली होती.

फ्रान्समध्ये 16 व्या शतकात शेतातील धान्य नष्ट केल्याप्रकरणी उंदरांवर खटला दाखल करण्यात आला होता. न्यायालयात एका वकिलाने उंदरांची बाजू मांडली. गावातील गल्लीबोळांमध्ये असलेल्या मांजरांच्या भीतीमुळे आपले अशील न्यायालयात हजर होऊ शकत नाही. त्यांच्यात रस्त्यातच माजरांकडून हल्ला होऊ शकतो. त्यांच्या जीवाला धोका असल्याने ते न्यायालयात उपस्थित राहू शकत नाही. न्यायालयाने वकीलाची बाजू मान्य करत उंदरांना शिक्षा सुनावली नाही.

अमेरिकेत सप्टेंबर 1816 मध्ये सर्कसदरम्यान ट्रेनरची हत्या करणाऱ्या मेरी नावाच्या एका हत्तीणीला फाशीची शिक्षा सुनावण्यात आली होती. ट्रेनरची हत्या केल्याच्या आरोपाखाली तिच्यावर खटला दाखल करण्यात आला. टेनेसीजवळील अरवीन गावात तिला फाशी देण्यात यावी असे आदेश न्यायालयाने दिले होते. ब्राझीलमध्ये 1713 मध्ये ढेकणांविरोधात खटला दाखल करण्यात आला होता. चर्चची मौल्यवान संपत्ती नष्ट केल्याचा आरोप त्यांच्यावर होता.