‘तू माझा सांगाती” मालिकेत विठ्ठलपंतांच्या भूमिकेत शेखर फडके

सामना ऑनलाईन । मुंबई

प्रत्येक कलाकार हा आपल्या भूमिकेला योग्य न्याय देण्याचा प्रयत्न करत असतो. आपली मालिकेत किंवा सिनेमात असणारी व्यक्तिरेखा चांगली साकारली जावी यासाठी तो ती भूमिका समरसून जगत असतो. आपली प्रत्येक भूमिका अगदी प्रामाणिकपणे साकारणारे अभिनेते शेखर फडके आपल्याला एका नव्या भूमिकेत पाहायला मिळत आहेत. कलर्स मराठी वाहिनीवर सुरू असलेल्या ‘तू माझा सांगाती’ या मालिकेत ‘विठ्ठलपंत कुलकर्णी’ म्हणजेच ज्ञानेश्वरांच्या वडिलांची भूमिका साकारत आहेत. नेहमीपेक्षा वेगळा लुक आहे, तसेच चरित्र भूमिका या मालिकेत ते साकारत आहे. या मालिकेचे निर्माते आणि मालिका दिग्दर्शक आहेतसंगीत कुलकर्णी.

अनेक मराठी नाटकांमध्ये, मालिकांमध्ये तसेच सिनेमांमध्ये शेखर फडके यांच्या अभिनयाचे अनेक पैलू आपल्याला पाहायला मिळाले आहेत. या मालिकेतही त्यांच्या अभिनयातील वैविध्य आपल्याला पाहायला मिळते आहे. आतापर्यंत त्यांनी विनोदी भूमिका, तसेच कलर्स मराठी वरील ‘सरस्वती’ मालिकेतील ‘भिकूमामा’ हा विनोदी खलनायक साकारला आहे, जो तुम्हा प्रेक्षकांच्या मनाला भावला होता आणि आता तू माझा सांगाती या मालिकेत त्यांचा गंभीर स्वरूपाचा अभिनय पाहायला मिळतोय.

विठ्ठल हे पंढरपूरची वारी करणाऱ्या वारकऱ्याच्या मुखी असलेलं नावं. या नावाचा महिमा अशी आहे की नाव उच्चारताच अंगी उत्साह जाणवतो. या विठ्ठलाचे अनेक भक्त होते, ज्यांना आपण संत म्हणून ओळखतो. अशा या संतांची परंपरा सांगणारी कथा, कलर्स मराठीवरील तू माझा सांगाती या मालिकेत पाहायला मिळत आहे. सध्या मालिकेत संत ज्ञानेश्वर यांची महती सांगण्यात येत आहे. शेखर फडके यांनी आपल्या विनोदी शैलीतल्या भूमिकांनी प्रेक्षकांना हसवलं आहे. ते साकारत असलेली ही विठ्ठलपंतांची भूमिका प्रेक्षकांना नक्की आवडेल यात शंका नाही.