हिंदुत्वाच्या वटवृक्षाला कीड लागू देऊ नका- उद्धव ठाकरे

shivsena-bjp-new

सामना ऑनलाईन । अमरावती

युती नव्हती त्याकाळातही आम्ही एकदिलाने काम केलं. शिवसेनाप्रमुख बाळासाहेब आणि अटलजी आज पाहिजे होते. त्यांनी हे वैभव पाहिलं पाहिजे होतं. त्यांनी मरमर मेहनत केली, कष्ट केले. त्यांनी जे रक्त आटवलं त्यातून हा वटवृक्ष उभा राहिलेला आहे. त्या वटवृक्षाला कीड लागू देऊ नका, असं शिवसेना पक्षप्रमुख उद्धव ठाकरे यांनी आज ठणकावलं.

शिवसेना-भाजपची युती झाल्यानंतर अमरावती येथे आज दोन्ही पक्षाच्या पदाधिकाऱ्यांचा संयुक्त महामेळावा आयोजित करण्यात आला होता. या वेळी शिवसेना पक्षप्रमुख उद्धव ठाकरे आणि राज्याचे मुख्यमंत्री देवेंद्र फडणवीस उपस्थित होते. यावेळी बोलताना त्यांनी आता जे करायचं ते मनापासून करायचं. इथे मी शिवसेना – भाजप ओळखत नाही. मी फक्त भगवा ओळखतो. ज्याच्या हातात आणि हृदयात भगवा आहे तो गद्दारी करणार नाही. करता कामा नये, असं उद्धव ठाकरे यांनी ठणकावलं.

चार वर्षाच्या संघर्षानंतर पुन्हा युती कशी झाली असा प्रश्न केला जात असंल्याच म्हणत त्यांनी युती कशासाठी केली याचे खणखणीत उत्तर आज दिले. ’25 वर्ष युती, नंतर चार साडेचार वर्ष संघर्षाची. मात्र जो संघर्ष झाला तो राज्याच्या विकासाच्या आड आम्ही येऊ दिलेला नाही’, असं त्यांनी स्पष्ट सांगितलं.

जनतेच्या मागण्याच आम्ही सरकारकडे मांडल्या. त्यासाठी लढलो कारण योजना बनतात. मात्र यंत्रणेत शुक्राचार्य असतात. त्यांच्यामुळे या योजना जनतेपर्यंत पोहोचत नाही. त्यांना काढा आणि ज्या लोकांसाठी योजना आहे त्यांच्यापर्यंत पोहोचू द्या, इतकं आमच म्हणणं होतं. ते मुख्यमंत्र्यांनी मान्य केल्याचेही त्यांनी सांगितलं.

होय आम्ही इच्छुक आहोत, पण

आम्ही वैयक्तीक इच्छा, महत्वाकांक्षा असणारे नाहीत. आम्ही आमचा देश, आमचा हिंदुस्थान, आमच्या हिंदुस्थानचं पायीक असणारं सरकार आणणं, असा पंतप्रधान तिथं बसवण्याची आमची इच्छा आहे, असं उद्धव ठाकरे ठामपणे म्हणाले.

आपल्याकडे दोन्ही पक्षाचे वाघ

आनंदराव तुम्ही काळजी करू नका. गारुडी येऊ द्या, कुणी येऊ द्या. सापाची औलाद आपल्याकडे नाही. मुंगुस आणि सापाची औलाद आपल्याकडे नाही, आपल्याकडे दोन्ही पक्षाचे वाघ आहेत. त्या गारुड्याला म्हणा पुंगी वाजवत बस. पण ती पुंगी सुद्धा गाजराची आहे. वाजली तर वाजली नाही तर मोडून खाल्ली, असा टोला त्यांनी यावेळी लगावला.

मी फक्त भगवा ओळखतो

आता जे करायचे ते मनापासून करायचं. इथे मी शिवसेना – भाजप ओळखत नाही. मी फक्त भगवा ओळखतो. ज्याच्या हातात आणि हृदयात भगवा आहे तो गद्दारी करणार नाही. करता कामा नये, असं उद्धव ठाकरे यांनी ठणकावलं.

कुणासोबत जुळवायचं?

तो पाच वर्षांचा संघर्ष सोडा हो. पण आता जर आपण चुकलो. मला सांगा कोणासोबत जुळवायचे? 50 वर्ष ज्यांच्याबरोबर संघर्ष केला ते आपल्याला जवळचे की दुर्दैवाने हे पाच वर्ष आपल्यासोबत संघर्ष झाला ते आपल्या जवळचे? कुणाला मिठ्या मारयच्या? कुणासोबत जुळवायचं? कोण जवळचा?, असा सवाल त्यांनी केला.