कराडमध्ये मुलानेच केला जन्मदात्या बापाचा खून

मुलाने लाकडी दांडक्याने केलेल्या मारहाणीत जन्मदात्या बापाचा मृत्यू झाल्याची घटना कराड तालुक्यातील कोपर्डे हवेली येथे घडली आहे. याप्रकरणी कराड तालुका पोलिसांनी खुनाचा गुन्हा दाखल करून मुलाला अटक केली आहे. तानाजी लक्ष्मण होवाळ (वय 65, रा. कोपर्डे हवेली, ता. कराड) असे खून झालेल्याचे नाव आहे, तर अभिजित ऊर्फ पप्या होवाळ याला पोलिसांनी अटक केली आहे. संजय श्यामराव सरगडे (वय 53, रा. कोपर्डे हवेली, ता. कराड) यांनी फिर्याद दिली आहे.

अभिजित होवाळ हा मंगळवारी रात्री घराबाहेर उभा राहून फोनवरून ‘मी पप्पाला मारले असून, मी आता मुंबईला जाणार आहे,’ असे कुणालातरी सांगत होता. हा संवाद सरगडे यांनी ऐकला होता. त्यानंतर सरगडे यांच्या भावाने ‘पप्याने त्याच्या बापाला मारले असून, तो पळून गेला आहे,’ असे त्यांना सांगितले. त्यामुळे सरगडे यांनी होवाळ यांच्या घरी जाऊन पाहिले असता तेथे तानाजी होवाळ हे मृतावस्थेत आढळून आले. शेजारी होवाळ यांची पत्नी आणि मुलगी बसलेली होती. त्यानंतर तेथे जमलेल्या नातेवाईकांनी तानाजी होवाळ यांच्यावर पहाटे कोपर्डे हवेली येथील स्मशानभूमीत अंत्यसंस्कार केले. या सर्व घटनेची माहिती मिळाल्यानंतर पोलिसांनी तपास करून पप्या  होवाळ याला अटक केली आहे. पोलीस निरीक्षक आनंद खोबरे तपास करीत आहेत.