ताडोबातील वाघाला श्रद्धांजली, अधिकारी आणि स्थानिक नागरिकांनीही वाहिली फुले

वाघ हा हिंस्त्र प्राणी असला तरी त्याच्यावर माणसाने अपार माया करावी आणि तो गेल्यानंतर त्याच्यासाठी आसवे ढाळावी, हे चित्र अभावानेच दिसते. वाघडोह नावाच्या वाघाच्या नशिबी हे प्रेम दिसून आले. ताडोबाचा बाप म्हणून प्रसिद्ध असलेला वाघडोह नावाचा धिप्पाड वाघाचा वयाच्या 17 व्या वर्षी नैसर्गिकरित्या मृत्यू झाला. वाघडोह याला ताडोबाच्या मोहर्ली गेटवर श्रद्धांजली अर्पण करण्यात आली.

एखाद्या वाघाला कार्यक्रम घेऊन श्रद्धांजली अर्पण करण्याची ही इथली पहिलीच वेळ आहे. त्यामुळे या प्राण्यावर इथल्या लोकांचे, कर्मचाऱ्यांचे किती प्रेम होते, हे दिसून येते. या श्रद्धांजली कार्यक्रमाला अधिकारी, पर्यटक मार्गदर्शक, स्थानिक नागरीक आणि हॉटेल व्यावसायिक उपस्थित होते. ताडोबात असतानाच्या या वाघाच्या वेगवेगळ्या आठवणी यावेळी अनेकांनी सांगितल्या.

ताडोबा कोअर असो किंवा बफर क्षेत्रातील पर्यटन असो, वाघडोह हा नेहमीच पर्यटकांच्या आकर्षणाचा केंद्रबिंदू राहिला होता. वयाची सुमारे दहा वर्षे म्हणजे बालपण आणि तारुण्य ताडोबात रुबाबात घालवल्यानंतर युवा वाघांनी त्याला कोअर क्षेत्र सोडण्यास भाग पाडले होते. वृद्धापकाळामुळे शेवटचे काही दिवस तो गावाशेजारी येऊन राहू लागला होता. चंद्रपूरलगतच्या सिनाळा जंगलात त्याचा मृतदेह सापडला होता. या प्रिय वाघाला श्रद्धांजली देताना सारेच भावूक झाले होते.