तारक मेहता का उल्टा चष्मा ही छोट्या पडद्यावरील प्रचंड गाजलेली मालिका आहे. गेली 14 वर्ष सलग ही मालिका प्रेक्षकांचं मनोरंजन करत आहे. या मालिकेतील कलाकारांनी देखील लोकांच्या मनात घर केलं आहे. अनेक कलाकारांनी ही मालिका सोडली त्या जागी दुसरे कलाकार आले मात्र मालिकेची लोकप्रियता कमी झाली नाही. असे असताना आता ही मालिका सोडून गेलेल्या एका अभिनेत्रीने तिला तिच्या मेहनतीचे पैसे अद्याप मिळेले नसल्याचा आरोप केला आहे.
नेहा मेहता असे त्या अभिनेत्रीचे नाव असून तिने मालिकेत अंजली भाभीची भूमिका केली होती. नेहाने तब्बल 12 वर्ष ही भूमिका निभावली व तिची भूमिकाही इतर कलाकारांप्रमाणेच प्रेक्षकांच्या पसंतीस पडली होती. ”मी तारक मेहता का उल्टा चष्मा या मालिकेत तब्बल 12 वर्ष काम केलं आहे. 2020 मध्ये मी ही मालिका सोडली. त्याआधी काही महिन्यांपासूनच माझे पैसे दिले गेले नव्हते. मी मालिका सोडून दोन वर्ष उलटली अद्याप मला माझ्या मेहनतीचे पैसे मिळालेले नाहीत. मालिका सोडल्यानंतर मी त्यांना फोन करून माझे पैसेही मागितले. मला सतत तक्रार करायला आवडत नाही. मला अजुनही आशा आहे की लवकरच यावर तोडगा निघेल व मला माझे पैसे मिळतील”, असे नेहा मेहताने प्रसारमाध्यमांशी बोलताना सांगितले आहे.
लवकरच या मालिकेत दिसणार नवी दयाबेन
तारक मेहता का उल्टा चष्मा या मालिकेतील मुख्य किरदार असलेल्या दयाबेनच्या भूमिकेत लवकरच अभिनेत्री राखी विजन दिसणार आहे. याआधीची अभिनेत्री दिशा वाकानी ही गेल्या पाच वर्षांपासून मालिकेपासून दूर होती. ती परतेल अशी आशा निर्मात्यांना होती मात्र अखेर दिशाच्या जागी राखीची निवड करण्यात आलेली आहे.
