वेब न्यूज

सोशल नशेपासून सुटका : फेसबुक, व्हॉटस्ऍप, गुगल हे आता आपल्या आयुष्याचाच एक अविभाज्य अंग बनू लागले आहेत. चिंतेची गोष्ट म्हणजे मोठ्य़ा प्रमाणावर लोक या सोशल मीडिया प्लॅटफॉर्मच्या सवयीत गुंतू लागले आहेत आणि जणू व्यसनीच बनले आहेत. या सोशल मीडिया प्लॅटफॉर्मवर वावरण्याच्या व्यसनाने जगभरातील अनेक लोकांना निद्रानाश, डिप्रेशन अशा गंभीर रोगांना सामोरे जावे लागते आहे. आता गुगल आणि फेसबुकसारख्या दिग्गज टेक कंपन्यांच्या माजी कर्मचाऱ्यांनीच या सोशल व्यसनाविरुद्ध एक अभियान सुरू केले आहे. तंत्रज्ञान कंपन्यांना लोकांच्यात पसरत चाललेल्या या व्यसनाची आणि त्यामुळे निर्माण होणाऱया गंभीर सामाजिक धोक्यांची जाणीव करून देणे आणि या कंपन्यांवर या सोशल व्यसनांपासून नागरिकांची सुटका करतील अशा उत्पादनांना बनवण्यासाठी दबाव आणणे ही या अभियानाची प्रमुख उद्दिष्टे आहेत. या सोशल मीडियामुळे लहान मुलांच्या भावनांवर आणि त्यांच्या विकासावरदेखील प्रचंड प्रभाव पडत असल्याचे अनेक परीक्षणांमधून समोर आले आहे. आता फेसबुक, गुगलसारख्या सर्वच कंपन्यांना त्याची जाणीव करून दिली जाणार आहे.

हिंदुस्थानींचा पासवर्ड किती सुरक्षित? : मॅकॅफे या तंत्रज्ञान सुरक्षा क्षेत्रातील कंपनीने नुकतेच पासवर्ड आणि त्याची सुरक्षा यासंदर्भात केलेल्या संशोधनातून एक धक्कादायक चित्र समोर आले आहे. ८९ टक्के हिंदुस्थानी हे नात्यांमध्ये एकमेकांचे खासगी आयुष्य जपले जावे असे ठामपणे सांगतात. मात्र ८४ टक्के हिंदुस्थानी आपले पासवर्ड आणि पिन नंबरजवळच्या व्यक्तीसोबत शेअरदेखील करतात असे हे निरीक्षण सांगते. याच निरीक्षणात असेही दिसले आहे की, चारपैकी तीन देशवासीयांना (७५ टक्के) आपल्या जोडीदाराचे लक्ष आपल्याकडे खेचण्यासाठी त्या जोडीदाराच्या फोन अथवा संगणकाशी स्पर्धा करावी लागत आहे. नात्यांच्या मध्ये येणारे हे तंत्रज्ञान लहान मुलापासून आजोबांपर्यंत सर्वच वयाच्या लोकांची अडचण करत असल्याचे दिसते. ८१ टक्के नागरिकांनी कबूल केले की, नात्यातील किंवा मित्रपरिवारातील व्यक्तीशी ते एकदा तरी या कारणाने भांडले आहेत की, ती व्यक्ती त्यांच्या बोलण्याकडे लक्ष न देता फोनशी खेळण्यात गुंतली आहे.