स्वस्त डेटामुळे दिवसा झोप येण्याचे प्रमाण वाढले

सामना ऑनलाईन । नवी दिल्ली

आजचे युग हे मोबाईलचे आहे. मोबाईलमध्येच अनेकांचे विश्व सामावलेले असते. त्यामुळे अनेकजण रात्री -बेरात्री फोनलाच चिकटलेले असतात. चॅटिग आणि सर्फिंगच्या व्यसनात तरुण अडकले असून त्यांना निद्रानाश जडत असल्याचे एका संशोधनातून उघड झाले आहे. त्यामुळे या व्यसनापासून दूर राहण्याचे आवाहन संशोधकांनी केले आहे. ब्रॉडब्रँडच्या वाढत्या गतीमुळे तरुणांची झोप उडाली असून त्यांना आवश्यक असलेली झोपही मिळत नसल्याने त्यांच्या आरोग्यावर याचे घातक परिणाम होत आहेत.

मोबाईल आणि गतीमान ब्रॉडब्रँडचा वापर करणाऱ्या तरुणांची झोप अर्ध्या तासाने कमी झाल्याचे संशोधनात नमूद करण्यात आले आहेत. गतीमान ब्रॉडबँड वापरणारे तरुण झोपेच्या वेळेतही सर्फिंग आणि व्हिडिओ पाहत असतात. चॅटिग आणि सर्फिंग करत असतात असे इटलीच्या बोकोनी विश्वविद्यापीठातील संशोधनी सांगितले. रात्री उशिरापर्यंत मोबाईलवर असलेले तरुण सकाळी कामसाठी लवकर उठतात. त्यानंतर ऑफीस आणि दिनचर्येमध्ये व्यग्र असतात. त्यामुळे शरीराला आवश्यक असलेली विश्रांती मिळत नसल्याने त्यांचा आरोग्यावर विपरीत परिणाम होतो. दिवसभर मरगळल्यासारखे वाटणे, उत्साह कमी होणे, नैराश्य येणे, नकारात्मक विचार वाढणे यासारखे दुष्परिणाम रात्री उशीरापर्यंत मोबाईलवर असणाऱ्यांमध्ये संशोधकांना आढळले आहेत.

संशोधकांनी तरुण वापरत असलेले मोबाईल, ब्रॉडब्रँडचा स्पीड आणि वापरकर्त्यांच्या आरोग्यावर होणारे परिणाम याचा अभ्यास केला. अनेक कपंन्या कमी किंमतीत स्वस्त डेटा आणि जास्त स्पीड देत असल्याने अनेक तरुणांना मोबाईल बंद करण्याचे भानच राहत नाही आणि हा मोहच त्यांना निद्रानाशाकडे नेत आहे, असे संशोधकांनी सांगितले. रात्रीची झोप शरीराला आवश्यक असल्याने सकाळी उशीरापर्यंत झोपूनही अनेकांची झोप पूर्ण होत नाही.

हिंदुस्थानातील ९३ टक्के युवकांची झोप कमी झाल्याचे संशोधनात म्हटले आहे. तर झोपेशी संबंधित आजार वाढत असून यासाठी डॉक्टरांकडे जाणाऱ्यांची संख्या २० टक्क्यांनी वाढली आहे. तर ५८ टक्के हिंदुस्थानीच्या आरोग्यावर आणि दिनचर्येंवर याचा परिणाम झाला आहे. अमेरिका आणि ब्रिटनसारख्या प्रगत देशात हायस्पीड इंटरनेटमुळे तरुणांसह विद्यार्थ्यांनाही निद्रानाशाने विळखा घातल्याने दिसून आले आहे. तसेच १३ ते ३० वयोगटातील तरुण सोशल मिडियावर अॅक्टिव असतात. तर ३१ ते ५९ या वयोगटातील व्यक्ती सर्फिंग करत असल्याचे, इकोनॉमिक बिहेवियर अॅण्ड ऑर्गनाइजेशन जर्नलमध्ये म्हटले आहे.