वेगवेगळय़ा धाटणीच्या भूमिका करीत अभिनेता आदिनाथ कोठारेने आपला वेगळा ठसा उमटवला आहे. ‘चंद्रमुखी’मधील दौलतराव देशमाने या रुबाबदार राजकारण्याची दमदार भूमिका साकारणारा आदिनाथ आता रॅपर स्वॅग दर्शवणाऱया ‘बजाव’ या जिओ सिनेमावरील वेब सीरिजमध्ये दिसणार आहे. यात ‘ओजी’ या दिल्लीतल्या रॅपरची खलनायकी छाप असलेली भूमिका त्याने साकारली आहे.
सोज्वळ धाटणीच्या भूमिका करणाऱया आदिनाथसाठी हा एक चॅलेजिंग रोल असल्याचे तो सांगतो. आपल्या भूमिकेविषयी आदिनाथ सांगतो, माझ्या आजवरच्या भूमिकांपेक्षा वेगळी भूमिका मला पहिल्यांदाच ‘बजाव’मुळे करता आली. मी पक्का मुंबईकर आहे. या भूमिकेसाठी दिल्लीच्या भाषेचा लहेजा आत्मसात करणे आणि रॅपरचा स्वॅग अंगात भिनवणे खूप चॅलेजिंग होते. खूप मजामस्ती आणि धमाल आणणारी ही वेब सीरिज आहे. ही सीरिज माझ्यासाठी विशेष आहे. कारण आपल्या कंफर्ट झोनमधून बाहेर येऊन वेगळे करायला मिळाल्याचे समाधान ‘बजाव’ने दिल्याचे आदिनाथ सांगतो.
या भूमिकेविषयी मी साशंक होतो, पण जिओ वाहिनीचे प्रोग्रामिंग हेड तेजकरण सिंग यांनी माझ्यावर विश्वास दाखवला. त्यांनी माझ्यावर दाखवलेला विश्वास आणि माझी मेहनत या दोन्ही गोष्टींमुळे ही भूमिका चांगल्या प्रकारे करू शकलो. एका चांगल्या प्रोजेक्टचा भाग होता आल्याचा आनंद व्यक्त करतानाच वेब सीरिजला मिळत असलेला प्रतिसाद आणि माझ्या भूमिकेचे होत असलेले कौतुक नक्कीच प्रोत्साहन देणारे आहे, अशा भावना यावेळी आदिनाथ कोठारेने व्यक्त केल्या. बॉडी लँग्वेजपासून ते अगदी शिव्यांचा ‘रिदम फ्लो’ कसा असायला हवा? या सगळय़ा गोष्टी आदिनाथने स्वतःमध्ये बारकाईने भिनवत हा ‘ओजी’ रॅपर साकारला आहे.
