जवानांवर दगडफेक करणाऱ्यांना बॉम्बने उडवून टाका!

38

सामना ऑनलाईन । नवी दिल्ली

विश्व हिंदू परिषदेचे (विहिंप) आंतरराष्ट्रीय कार्याध्यक्ष प्रवीण तोगडिया यांनी जम्मू-कश्मीरमध्ये जवानांवर दगडफेक करणाऱ्यांवर कारवाई करण्यासाठी जवानांचे हात मोकळे करण्यात यावे अशी मागणी केली आहे. विहिंपच्या कार्यकर्त्यांना संबोधित करताना तोगडिया यांनी हे वक्तव्य केलं आहे. जम्मू-कश्मीरमध्ये हिंदुस्थानी लष्कराचे जवानच सुरक्षित नाहीत तर सामान्य नागरिक कसं सुरक्षित असणार, असा प्रश्न तोगडिया यांनी उपस्थित केला आहे. कश्मीरमध्ये जवानांवर दगडफेक करणाऱ्यांवर बॉम्ब टाकून उडवून देण्याचा आदेश देण्यात यावा अशी मागणी आपण केल्याचं तोगडिया यांनी सांगितलं.

तोगडिया यांनी १९७१मध्ये तत्कालीन पंतप्रधान इंदिरा गांधी यांनी घेतलेल्या निडर भूमिकेचेही कौतुक केलं. तसेच पाकिस्तानसोबत युद्ध करण्याची हिच योग्य संधी असल्याचंही तोगडिया यांनी म्हटलं आहे. इंदिरा गांधी यांनी पाकिस्तानचे दोन तुकडे करत ९० हजार सैनिकांना हत्यार खाली ठेवण्यास भाग पाडले होते त्यामुळे सध्याच्या सरकारकडे पाकिस्तानचे पाच तुकडे करून एक लाख सैनिकांना पकडण्याची संधी आहे, असेही तोगडिया म्हणाले. पाकिस्तान प्रत्येक दोन दिवसांनी हिंदुस्थानी जवानांवर गोळीबार करत आहे, जवान शहीद होत आहेत. सरकारने पाकिस्तानविरुद्ध युद्धाची घोषणा करून त्याचे पाच तुकडे करण्याचा आदेश द्यायला हवा, असेही तोगडिया यांनी म्हटलं.

जैश-ए-मोहम्मदच्या दहशतवाद्यांनी हल्ला केल्याच्या काही तासांमध्ये जम्मू-कश्मीर विधानसभेत आमदाराने पाकिस्तान जिंदाबादच्या घोषणा देण्यात आल्या. यावर बोलताना तोगडिया म्हणाले की, हिंदुस्थानमध्ये राहून पाकिस्तान जिंदाबाद बोलणाऱ्यांना तत्काळ अटक करावी आणि फाशीची शिक्षा देण्यात यावी. त्यामुळे पुन्हा कोणीही पाकिस्तानच्या समर्थनार्थ घोषणाबाजी करणार नाही, असे तोगडिया म्हणाले.

आपली प्रतिक्रिया द्या