लेख : चिनी वस्तूंवर बहिष्कार हाच उपाय!

902

>> ब्रिगेडियर हेमंत महाजन, [email protected]

चीन हा पाकिस्तानचा सर्वात मोठा समर्थक आहे हे पुन्हा एकदा स्पष्ट झाले आहे. म्हणूनच चीनला धडा शिकवणे गरजेचे आहे. गेल्या पाच वर्षांपासून आपण चीनशी व्यापारी समतोल साधण्याचा प्रयत्न करत आहोत, परंतु चीन लबाडी करून हिंदुस्थानला आयातीपेक्षा पाचपटीने जास्त वस्तू निर्यात करतो. आंतरराष्ट्रीय व्यापारी कायद्यामुळे आपल्याला चीनच्या आयातीवर बंदी घालता येत नाही. म्हणून सामान्य नागरिकांनीच चिनी वस्तूंवर बहिष्कार घालून चीनमधून होणारी आयात थांबवावी आणि देशाला मदत केली पाहिजे.

गेल्या काही दशकांपासून चिनी घुसखोरी ही फक्त सीमेपुरतीच मर्यादित नाही तर त्यांनी हिंदुस्थानी बाजारपेठाही काबीज करायाला सुरुवात केली. सणातील व निवडणुकांनंतर फटाक्यांची मागणी लक्षात घेऊन चिनी फटाके मोठय़ा प्रमाणावर हिंदुस्थानी बाजारपेठांमध्ये विक्रीसाठी दाखल होत आहेत. हिंदुस्थानी फटाक्यांच्या तुलनेत चिनी फटाके सुरक्षिततेच्या, पर्यावरणाच्या दृष्टीने अधिक धोकादायक आहेत.

हिंदुस्थान हा सणांचा देश आहे. मागच्या वर्षी रक्षाबंधनाकरिता 75 टक्के राख्या चिनी बनावटीच्या होत्या. गणेशमूर्तीच्या बाजारपेठेत चीनने घुसखोरी पूर्वीच केलेली आहे. मोठय़ा प्रमाणात साजरे केले जाणारे उत्सव हेरून आकाशकंदील, दिवे, विविध भेटवस्तूंनी हिंदुस्थानी बाजारपेठ चीन व्यापत आहे. मागच्या दिवाळीत चिनी विक्रेत्यांनी हिंदुस्थानी बाजारपेठेत 1800 कोटी रुपयांचा नफा कमवला. फराळाचे पदार्थ वगळता दिवाळीच्या सर्व वस्तूंमध्ये चीनने घुसखोरी केली आहे. चिनी आकाश कंदिलांनी बाजारपेठेवर कब्जा केला आहे. चिनी तोरणांनी घरबाजार सजतो. प्लॅस्टिकच्या दिव्यांच्या माळांना मोठी मागणी आहे. देशप्रेमी नागरिकांनो, देशी वस्तूच विकत घ्या.

चिनी बनावटीचे फटाके स्वस्त असल्याने हिंदुस्थानात चिनी बनावटीच्या फटाक्यांना अधिक मागणी असते. केंद्र सरकारने चिनी बनावटीच्या फटाक्यांवर बंदी घातली होती. चिनी फटाक्यांनी हिंदुस्थानी बाजारपेठ काबीज केली आहे. समुद्रमार्गे बेकायदेशीररीत्या आयात होणाऱया या फटाक्यांमुळे फटाके उद्योग धोक्यात आला आहे. आपले फटाके गुणवत्ता आणि सुरक्षिततेच्या दृष्टीने चिनी फटाक्यांपेक्षा निश्चित चांगले आहेत. चिनी फटाक्यांमध्ये क्लोरेट आणि पर-क्लोरेट या विषारी केमिकलचा वापर करण्यात येतो. एकूणच चिनी फटाके बनवताना हलक्या प्रतीचा व हानीकारक कच्चा माल वापरला जात असल्याने ते आपल्या फटाक्यांच्या तुलनेत स्वस्त आहेत. चिनी फटाके जास्त काळ टिकत नाहीत. त्या तुलनेत हिंदुस्थानी फटाके वर्षभर टिकतात. मात्र फटाके उद्यागाने आधुनिक बनण्याची गरज आहे, जेणेकरून हिंदुस्थानी फटाके जागतिक उत्पादनांशी स्पर्धा करू शकतील. आपण चिनी फटाके आपण टाळावेत. कारण आपल्या फटाके उद्योगाचे हजारो कोटींचे नुकसान होते. परदेशातून येणाऱया कंटेनरची चौकशी करण्यासाठी पुरेसे मनुष्यबळ नसल्याचे कस्टम विभागाचे रडगाणे असते. बंदरावर येणाऱया 5-10 टक्के कंटेनरची तपासणी केली जाते. मागे शिवाकाशीमध्ये चिनी फटाके जप्त करण्यात आले होते. हे फटाके तुतिकोरीनमधून मुंबईत नेले जात होते. दोन वर्षांपूर्वी नेपाळमधून देशात आलेले 600 कंटेनर पकडण्यात आले होते. बहुतेक माल नेपाळमार्गे किंवा समुद्रमार्गे हिंदुस्थानात येतो.

‘मेड इन चायना’ वस्तूंनी हिंदुस्थानात जम बसवला आहे. त्यांनी आतापर्यंत देशी बाजारपेठेतील 20-25 टक्के वाटा गिळला आहे. किमती कमी असल्याने हिंदुस्थानी विक्रेते व ग्राहकांची चिनी वस्तूंना पसंती लाभत आहे. हिंदुस्थानीय बाजारपेठेत मोबाईल, इलेक्ट्रॉनिक वस्तूंपासून देवांच्या तसबिरी ते पूजेच्या साहित्यापर्यंत चीनची घुसखोरी आहे. आपली बाजारपेठ चिनी वस्तूंनी ओसंडून वाहते आहे. टाचण्यांपासून लहान मुलांच्या निरनिराळ्या प्रकारच्या खेळण्यांपर्यंत, वॉटर प्युरिफायर, गॅस गीझर, इलेक्ट्रॉनिक्सच्या वस्तू, इलेक्ट्रिकच्या आकर्षक माळा, इलेक्ट्रिकच्या इस्त्राrसारख्या अनेक वस्तू अशा प्रकारच्या चिनी बनावटीच्या वस्तू कमी किमतीत बाजारात सहज मिळतात.चीन खास हिंदुस्थानकरिता वस्तू बनवून आपल्या लहान, मध्यम उद्योगांना पद्धतशीरपणे बरबाद करत आहे हे आपण लक्षात का घेत नाही? खेळण्यांचे मार्केट 80 टक्के चिनी बनावटीच्या खेळण्यांनी भरले आहे. ‘सेंटर फॉर सायन्स अँड एन्व्हायर्नमेंट’प्रमाणे चिनी बनावटीच्या 57 टक्के खेळण्यांमध्ये प्रमाणाबाहेर विषारी रसायने आढळली होती. लहान मुलींच्या ज्वेलरीत शिसे वापरले जाते. त्यामुळे शरीराला धोका असतो. हिंदुस्थानात अशा खेळण्यांवर नियंत्रण ठेवणारी कुठलीही स्वतंत्र यंत्रणा नाही. पालकांनी एकत्र येऊन या खेळण्यांवर बंदी घालण्यासाठी दबाव आणला पाहिजे.

हिंदुस्थानचे याआधीचे ‘बाय चायनीज’ धोरण त्या देशाच्या पथ्यावरच पडत आहे. हिंदुस्थानातील वीज क्षेत्रातील कंपन्या चिनी उत्पादकानुसार बदल करीत आहेत आणि ते हिंदुस्थानी उत्पादकांकडे दुर्लक्ष करीत आहेत. चिनी कंपन्यांसाठी हिंदुस्थान ही मोठी बाजारपेठ बनली आहे. स्वदेशीची भाषा नष्टच झाली आहे. ‘मेक इन इंडिया’ला चालना मिळावी.

हिंदुस्थानींची घातक मानसिकता

चिनी वस्तू या लघुउद्योगांतून बनविल्या जातात. चिनी स्त्रिया या वस्तू घरी बनवतात. त्यामुळे त्यांची किंमत अत्यंत कमी आहे. आपल्या उद्योजकांची मानसिकताच बदलली आहे. चिनी वस्तू जर स्वस्तात मिळतात तर आपण त्या वस्तू कशाला बनवायच्या या विचाराने आपण चिनी वस्तूंचे कंटेनरच्या कंटेनर खरेदी करतो वा स्मगल करतो, त्यावर आपले लेबल लावतो आणि बाजारात विकतो. त्यात भरपूर पैसे कमवतो, पण त्यामुळे आपण चिनी अर्थव्यवस्थेला हातभार लावत आहोत. आपल्याकडे बेकारी वाढलेली आहे, सामाजिक सुरक्षितता धोक्यात येत आहे. चीनशी जर आपल्याला मुकाबला करावयाचा असेल तर आपणही त्यांच्याप्रमाण लघुउद्योग निर्माण करावयास हवा. त्यासाठी स्वस्तात जागा, भांडवल, कच्चा माल उपलब्ध करून दिला पाहिजे. कर कमी केले पाहिजेत. त्यामुळे आपणसुद्धा दर्जेदार वस्तू बनवू शकू. आता हा सर्व प्रकार रोखण्यासाठी सरकारनेच पुढाकार घेऊन, हिंदुस्थानी लघुउद्योग उत्पादनाला चालना देण्याची गरज आहे.

आपली प्रतिक्रिया द्या