शिवानी सुर्वेला एकेकाळी रोजच्या जेवणासाठीही करावा लागायचा संघर्ष

51

सामना ऑनलाईन । मुंबई

बिग बॉस मराठीच्या दुसऱ्या पर्वातली सर्वाधिक स्ट्राँग कंटेस्टंट मानल्या जाणाऱ्या देवयानी फेम अभिनेत्री शिवानी सुर्वेने आपली संघर्षकथा बिगबॉसमध्ये संपूर्ण महाराष्ट्रसमोर पहिल्यांदाच मांडली. दोन वेळच्या जेवणाची भ्रांत असण्यापासून ते समुद्रापासून 15 मिनीटांच्या अंतरावर आईचे स्वप्न पूर्ण करण्यासाठी घर घेण्यापर्यंतचा आपला संघर्षमयी आणि प्रेरणादायी प्रवास शिवानीने बिग बॉसमध्ये सगळ्यांना सांगितला.

मुळची चिपळुणची आणि लहानाची मोठी डोंबिवलीला झालेली शिवानी सांगते, “अभिनय क्षेत्रात अपघातानेच आले. आई-वडिलांचे एक्सिबिशन शिवाजीमंदिर नाट्यगृहाच्या शेजारी होते. तिथे मनोहर नरे यांनी ओम नाट्यगंधच्या ‘मांगल्याचे लेणे’ नाटकात मला संधी दिली. ह्या नाटकाच्यावेळी मी डोंबिवलीहून सगळीकडे प्रवास करायचे आणि एकदा एक अख्खी रात्र मला आजीसोबत प्लॅटफॉर्मवर काढावी लागली. त्यामूळे आईने ठरवलं आता मुंबईतच राहायला यायचं. म्हणून आम्ही सायनला राहायला यायचा निर्णय घेतला. पण त्यानंतर आमची आर्थिक स्थिती खूप खालावली.”

ती सांगते, “एकवेळ अशी आली की, जेव्हा घरात खायचे पैसे नव्हते. कित्येकदा माझ्या लहान बहिणीला पार्ले-जीच्या पुड्यावर अख्खा दिवस काढायची वेळ आलीय. तेव्हा वाण्याकडून सामान आणताना अपुऱ्या पैशाअभावी दहा रूपयाची डाळ, दहा रूपयाचे तांदुळ आणि दहा रूपयाचे तेल आणावे लागायचे. तेवढेच पैसे कसेबसे असायचे. त्यावेळी मी ठरवलं, की घरच्यांसाठी काहितरी करायचं. आणि आज मला अभिमान आहे की, मी वयाच्या 16 वर्षी गाडी घेतली. आणि सतराव्या वर्षी आईचे समुद्रापासून 15 मिनिटांवर स्वत:चं घर घ्यायचं स्वप्न पूर्ण केले. “

आपली प्रतिक्रिया द्या