नगर जिल्ह्याला पुण्यश्लोक अहिल्यादेवी होळकर यांचे नाव देण्यात यावे, अशी आग्रही मागणी करून त्याची अंमलबजावणी करण्यासाठी सुरू असलेल्या जनजागृती रथयात्रेच्या आपण सोबतच आहोत, अशी भावना आमदार रोहित पवार यांनी व्यक्त केली. जिल्ह्याचे नामकरण पुण्यश्लोक अहिल्यादेवी होळकर नगर करावे असे ते म्हणाले.
नामांतर यात्रा 9 फेब्रुवारी 2023 रोजी सकाळी 11 वाजता चोंडीहून कर्जत, श्रीगोंदा येथे मुक्कामी असणार आहे. या नामांतर रथयात्रेस श्री परमपूज्य खेलोबा राजाभाऊ वाघमोडे उर्फ फरांदे महाराज श्रीक्षेत्र गुरुदेव देवस्थान पट्टणकलोडी जि. कोल्हापूर येथील मुख्य मानकरी व भाकणूककार यांच्या हस्ते आणि श्री विठ्ठल बिरुदेव देवस्थानचे पुजारी नारायण खानू मोठे देसाई यांच्या प्रमुख उपस्थितीत सुरुवात झाली. यावेळी ते बोलत होते. रथयात्रेसाठी पुण्यश्लोक अहिल्यादेवी होळकर नगर नामांतर कृती समितीच्या वतीने विजय तमनर, सचिन डफळ, निशांत दातीर, राजेंद्र तागड, अक्षय भांड, दत्तात्रय खेडेकर अशोक होनमाने विनोद पाचरणे, संदीप भांड आदी यावेळी उपस्थित होते.
या यात्रेविषयी आमदार पवार यांनी सांगितले की, नगर जिल्ह्याला पुण्यश्लोक आहिल्यादेवी होळकर यांचे नाव देण्यात यावे, अशी मागणी नागपूर हिवाळी अधिवेशनामध्ये करण्यात केली. या मागणीकरिता अनेक दिवसांपासून पाठपुरावा करत होते. पुण्यश्लोक अहिल्याबाई होळकर यांच्या इतकी कार्यकुशलता असलेले व्यक्तिमत्त्व नाही. पुढील काळात ही मागणी विधान परिषदेत आली, तर आपण नक्कीच सहभागी होणार आहोत तसेच चोंडी येथील विकासकामांना प्राधान्य देत 09 कोटी रुपयांची नव्याने कामे करणार आहोत, असे त्यांनी सांगितले.
पुण्यश्लोक आहिल्यादेवी होळकर यांची 31मे रोजी होणारी जयंती साजरी करण्यापूर्वी नामांतर झाले नाही, तर कार्यक्रम होऊ देणार नाही, असा इशारा कृती समितीच्या वतीने देण्यात आला. आगामी अधिवेशनादरम्यान हा विषय मार्गी लावण्यासाठी सर्व लोकप्रतिनिधींना भेटणार असल्याचे त्यांनी सांगितले.
