नाशिक-मुंबई महामार्गावरील नवीन कसारा घाटातील बलगर पॉइंट जवळ भीषण अपघाताची घटना घडली आहे. नाशिकहून मुंबईकडे जाणारा दूधाचा टँकर थेट 300 फूट दरीत कोसळला. या अपघातात पाच जणांचा जागीच मृत्यू झाला तर चौघे जण जखमी झाले आहेत. या घटनेनंतर अवैधरित्या प्रवाशी बसवणाऱ्या टँकरवर कारवाई करण्याची मागणी होत आहे.
घटनेची माहिती मिळताच रूट पेट्रोलिंग टीम, आपत्ती व्यवस्थापन टीम आणि महामार्ग पोलिसांनी घटनास्थळी धाव घेऊन मदतकार्य सुरु केले. जोरदार पावसामुळे मदत कार्यात अडथळा येत होता. मात्र आपत्ती व्यवस्थापन टीमने अथक प्रयत्नांनी दोरीच्या सहाय्याने जखमी आणि मयतांना बाहेर काढले.
विजय घुगे, आरती जायभाय, सार्थक वाघ, रामदास दराडे आणि योगेश आढाव अशी अपघातात मृत्यू झालेल्या प्रवाशांची नावे आहेत. तर अक्षय विजय घुगे, श्लोक जायभाय, अनिकेत वाघ आणि मंगेश वाघ अशी जखमींची नावे आहेत. जखमींना उपचारासाठी उपचारासाठी प्राथमिक आरोग्य केंद्र कसारा आणि उपजिल्हा रुग्णालय शहापूर येथे दाखल करण्यात आले आहे.
घटनास्थळी उपविभागीय पोलीस अधिकारी मिलिंद शिंदे, तहसीलदार परमेश्वर कासुळे, महामार्गचे डीवायएसपी प्रदीप मैराळ, कसारा पोलीस ठाण्याचे प्रभारी अधिकारी सुनील बच्छाव, महामार्गचे पोलीस अधिकारी यांनी भेट देऊन पाहणी केली. घटनास्थळी सहाय्यक पोलीस निरीक्षक आर. एस. होंडे, पोलीस उपनिरीक्षक पी. साळुंके, पोलीस हवालदार सुनील खताळ, अमोल केदारे, पोलीस कॉन्स्टेबल सचिन बेंडकुळी, प्रवीण चासकर यांनी मृतदेह आणि जखमींना बाहेर काढण्यासाठी मदत केली.
