रांची कसोटी अनिर्णित राहणार? ऑस्ट्रेलियाची कडवी झुंज

6

सामना ऑनलाईन । रांची

हिंदुस्थान आणि ऑस्ट्रेलियात सुरू असलेली रांची कसोटी अनिर्णित अवस्थेकडे झुकताना दिसत आहे. आज कसोटीच्या पाचव्या दिवशी हिंदुस्थानी संघानं पहिल्या सत्रात पाहुण्या संघाला दोन धक्के दिले. इशांत शर्मानं रेन्शॉला पायचीत करत हिंदुस्थानला आजच्या दिवसातील पहिला बळी मिळवून दिला. त्यानंतरच्या दुसऱ्याच षटकात फिरकी गोलंदाज रवींद्र जाडेजानं ऑस्ट्रेलियाचा कर्णधार स्विव्हन स्मिथचा त्रिफळा उडवत हिंदुस्थानच्या विजयाच्या आशा उंचावल्या होत्या.

मार्श आणि हॅन्ड्सकॉम्बनची ‘झुंज’

कर्णधार स्मिथ बाद झाल्यानंतर आलेल्या शॉन मार्श आणिपिटर हॅन्ड्सकॉम्ब यांनी हिंदुस्थानी गोलंदाजांचा यशस्वी सामना केला. मार्श आणि हॅन्ड्सकॉम्बनं चहापानापर्यंत एकही बळी न जाऊ देता ऑस्ट्रेलियाचा स्कोअर ४ बाद १४९ पर्यंत पोहोचवला आहे. शॉन मार्श ३८ धावांवर आणि हॅन्ड्सकॉम्ब ४४ धावांवर खेळत होता. सामन्याचा आजच्या शेवटच्या दिवसाचं शेवटचं सत्र बाकी असल्यानं रांची कसोटी अनिर्णित राहणार की हिंदुस्थानी गोलंदाज चमत्कार घडवणार? हे पाहणं औत्सुक्याचं राहणार आहे.

त्याआधी कसोटीच्या चौथ्या दिवशी हिंदुस्थाननं आपला पहिला डाव ९ बाद ६०३ धावांवर घोषित केला होता. पुजारानं २०२ धावांची खेळी केली तर, साहानं ११७ धावा केल्या. त्यानंतर शेवटच्या सत्रात रवींद्र जाडेजानं भेदक गोलंदाजी करत दोन फलंदाजांना बाद केले. त्यामुळे ऑस्ट्रेलियाची दिवसअखेर २३ धावांवर २ गडी बाद अशी गंभीर स्थिती झाली होती.

 

आपली प्रतिक्रिया द्या