#INDvsNZ – टीम इंडियाचा न्यूझीलंडवर ‘सुपर’ विजय, मालिकाही जिंकली

15386

टीम इंडियाने सुपर ओव्हरमध्ये न्यूझीलंडचा पराभव केला असून पाच टी-20 सामन्यांच्या मालिकेत 3-0 अशी विजयी आघाडी घेतली आहे. सुपर ओव्हरमध्ये टीम इंडियापुढे न्यूझीलंडने 18 धावांचे आव्हान ठेवले होते. रोहित शर्माने अखेरच्या चेंडूवर षटकार ठोकत टीम इंडियाला रोमहर्षक विजय मिळवून दिला.

टीम इंडियाने प्रथम फलंदाजी करताना हिटमॅन रोहित शर्मा (65) आणि विराट कोहली (38) यांच्या फलंदाजीच्या जोरावर 180 धावा केल्या. या लक्ष्याचा पाठलाग करताना न्यूझीलंडचा संघही 179 धावाच करू शकल्याने सामना टाय झाला. अखेरच्या षटकांमध्ये 11 धावांची आवश्यकता असताना शमीने न्यूझीलंडच्या फलंदाजांना फक्त 10 धावा करू दिल्या. शमीने या षटकात धोकादायक विलियम्सनसह रॉस टेलर याची विकेट घेतल्याने सामना टाय झाला.

रोमहर्षक सुपर ओव्हरचा थरार
सुपर ओव्हरमध्ये न्यूझीलंडचा कर्णधार केन विलियम्सन आणि मार्टिन गप्टिल फलंदाजीला उतरले. दुसरीकडे कर्णधार विराटने जसप्रीत बुमराहच्या हातात चेंडू दिला. पहिल्या चेंडूवर एक धाव दिल्यानंतर, विलियम्सनने तिसऱ्या चेंडूवर षटकार आणि चौथ्या चेंडूवर चौकार ठोकला. त्यानंतर गप्टीलने अखेरच्या चेंडूवर चौकार ठोकत 17 धावा केल्या.

सुपर ओव्हरमध्ये न्यूझीलंडने 17 धावा चोपत टीम इंडियापुढे 18 धावांचे लक्ष्य ठेवले. या धावांचा पाठलाग करण्यासाठी राहुल आणि रोहित मैदानात उतरले. दुसरीकडे न्यूझीलंडचा कर्णधार केन विलियम्सनने टीम साऊदीच्या हातात चेंडू दिला. राहुलने एक चौकार आणि रोहितने दोन षटकार ठोकून हा सामना जिंकून दिला.

आपली प्रतिक्रिया द्या