इंडियन प्रीमियर लीग (आयपीएल) चा 13 वा हंगाम सुरू असून तीन वेळची विजेता चेन्नई सुपर किंग्ज गुणतालिकेत अखेरच्या स्थानावर आहे. चेन्नईचा संघ यंदा हरभजन सिंग आणि सुरेश रैना नसल्याने असंतुलित वाटत आहे. यामुळे संघाचा परफॉर्मन्स पहिल्या काही लढतीत लौकिकाला साजेसा झालेला नाही. रैना आणि हरभजन यांनी खासगी कारणाने अचानक माघार घेतली. यामुळे चेन्नई आणि या खेळाडूमधील संबंध बिघडल्याचे वृत्त आहे. चेन्नई या दोघांचे कॉन्ट्रॅक्ट संपवण्याच्या तयारीत आहे. सुरेश रैना चेन्नईच्या संघासोबत यूएईला गेला होता. या ठिकाणी सीएसकेचे 13 सदस्य कोरोना पॉझिटिव्ह आढळल्यानंतर रैनाने मायदेशी परतण्याचा निर्णय घेतला. नातेवाईकांवर हल्ला झाल्याने आपण माघार घेतल्याचे रैनाने नंतर स्पष्ट केले. तर भज्जीने देखील स्पर्धा सुरू होण्यापूर्वी आपले नाव मागे घेतले. यानंतर सीएसकेने या दोघांचे नाव आपल्या अधिकृत वेबसाईटवरून हटवले. तसेच सीएसके या दोघांचे कॉन्ट्रॅक्ट रद्द करण्याच्या तयारीत आहे, असे वृत्त 'इनसाइड स्पोर्ट'ने दिले आहे. चेन्नईने रैनाला 11 कोटी आणि भज्जीचा 2 कोटींना खरेदी केले होते. https://www.saamana.com/ipl-2020-rohit-sharma-join-suresh-raina-virat-kohli-5000-club/ कॉन्ट्रॅक्ट रद्द झाल्यावर पुढे काय? चेन्नई सुपर किंग्जने हरभजन आणि रैनाचे कॉन्ट्रॅक्ट रद्द केले आणि दोन्ही खेळाडूंना दुसऱ्या फ्रेंचाईजीने खरेदी केले तरच दोघे पुढील आयपीएल खेळू शकतील. मात्र पुढील आयपीएलपूर्वी लिलाव होण्याची शक्यताही कमी आहे, मात्र फ्रेंचाईजीना खेळाडू खरेदी करण्याची एक संधी मिळू शकते. आयपीएलमधील रैनाचा विक्रम पाहता त्याला आपल्या संघात घेण्यास चढाओढ लागण्याची शक्यता नाकारता येत नाही. मात्र भज्जीवर वयामुळे पैसे लावण्यास किती संघ उत्सुक होतील हे पाहणे औत्सुक्याचे असेल.
