लोकसभेच्या निवडणुका होईपर्यंत पत्रकारांना विरोधात काही छापू देऊ नका. वेळप्रसंगी त्यांना चहा पाजा, ढाब्यावर घेऊन बसा, असा अजब सल्ला भारतीय जनता पक्षाचे प्रदेशाध्यक्ष चंद्रशेखर बावनकुळे यांनी दिला. बावनकुळे यांच्या उपस्थितीत रविवारी नगर शहरातील सावेडी येथील माऊली सभागृहात बैठकीचे आयोजन करण्यात आले होते. यावेळी ते बोलत होते. याची ऑडियो क्लिपही व्हायरल झाली आहे.
‘बुथरचना आणि पदाधिकाऱ्यांनी सांभाळायच्या जबाबदाऱ्या’ या विषयावर बावनकुळे यांनी उपस्थित पदाधिकाऱ्यांना मार्गदर्शन केले. ‘पत्रकारांनी 2024 पर्यंत आपल्याविरोधात एकही बातमी छापू नये, यासाठी त्यांना चहा प्यायला घेऊन जा. त्यांना चहा प्यायला बोलवायचे म्हणजे समजलेच असेल. तसेच त्यांना ढाब्यावरही घेऊन जा, असा सल्ला चंद्रशेखर बावनकुळे यांनी पदाधिकाऱ्यांना दिला.
आपण गावांमध्ये काम करताना, केंद्रप्रमुखाची भूमिका पार पडताना आपल्याकडे कोण आहेत, केंद्रामध्ये जे कुणी पत्रकार, चॅनलवाले अथवा पोर्टल वॉलेट टिल्लू असतील ते कोण आहेत? ते आपल्या बरोबर किती जण आहेत? हे अगोदर पहा. आपण एवढे चांगले काम करतोय, पण हे मीडिया वाले किंवा टील्लू असे काही टाकतात की, जणू गावात बॉम्बच फुटलाय. यासाठी बुथवर जे चार, पाच पत्रकार आहेत त्यांची यादी तयार करा. यात एक-दोन पोर्टलवाले, प्रिंट आणि इलेक्ट्रॉनिकवाले असतील, त्यांना महिन्यातून एकदा चहा प्यायला बोलवा, चहा प्यायला बोलवायचे म्हणजे समजलेच असेल तुम्हाला. त्यात काही कमी जास्त झाले तर सुजय विखे आहेतच. एकही बातमी विरोधात येणार नाही याची काळजी घ्या, सर्व सकारात्मक बातम्या आल्या पाहिजेत, याची काळजी घ्या, असे बावनकुळे म्हणाले.
