नराधम काकाने अल्पवयीन पुतणीचे दुप्पट वयाच्या पुरुषाशी लावले लग्न

तेरा वर्षीय मुलीसोबत विवाह करणाऱ्या नवरदेवा विरोधात भादा पोलीस ठाण्यात बलात्काराचा गुन्हा दाखल करण्यात आला आहे. या प्रकरणी पीडित मुलीच्या चुलत्याने हा विवाह लावून दिल्याचे उघडकीस आल्याने त्यांच्यावरही गुन्हा दाखल करण्यात आला आहे.

याबाबत अधिक माहिती अशी की, शिंदाळा (ता.औसा) येथील रामदास प्रकाश वेदपाठक उर्फ बाळू ( वय 29) व पीडितेचा चुलता हे दोघे पीडित मुलीच्या वडीलाचा हात मोडला असल्याने त्यांना पाहण्यासाठी हैदराबाद येथे गेले होते. पीडितेच्या वडिलांना पाहिल्यानंतर परतत असताना आपल्या भावाच्या दोन्ही मुलींना मकरसंक्रांत या सणानिमित्त गावाकडे घेऊन जातो असे म्हणत पीडित मुलीसह तिच्या बहिणीला आपल्या सोबत घेऊन येळनूर (ता. निलंगा) या गावी आले. सुरवातीचे काही दिवस या मुली फोन करून आपल्या आई- वडिलांशी बोलत होत्या. परंतु नंतर यातील तेरा वर्षांच्या मुलीचे फोनवर बोलणे बंद झाले. याच काळात पीडित मुलीच्या दुसऱ्‍या एक चुलत्याने फोन करून तुमच्या तेरा वर्षांच्या मुलीचा विवाह शिंदाळा (ता.औसा) येथील रामदास वेदपाठक (उर्फ बाळू) या होमगार्डसोबत करून दिल्याचे पीडित मुलीच्या वडिलांना सांगितले. त्यानंतर पीडित मुलीच्या वडिलाने मुलीशी संपर्क साधून घटनेची माहिती विचारली असता घडलेला प्रकार तिने सांगितला.

सदरील अल्पवयीन मुलीचा विवाह 8 जानेवारी 2021 रोजी सास्तूर-माकणी या ठिकाणी लावून देण्यात आला होता. लग्नानंतर रामदास वेदपाठक (उर्फ बाळू) याने तेरा वर्षाच्या अल्पवयीन मुलीसोबत शारीरिक संबंध ठेवल्याची माहिती समोर आली. या प्रकरणी पीडित मुलीच्या वडिलांनी दिलेल्या फिर्यादीवरून भादा पोलिस ठाण्यात रामदास वेदपाठक (उर्फ बाळू) यांच्या विरोधात बाललैंगिक अत्याचार प्रतिबंधक कायदा व बालविवाह प्रतिबंधात्मक कायद्यानुसार तर चुलत्या विरोधात बालविवाह प्रतिबंधात्मक कायद्यानुसार गुन्हा दाखल करण्यात आला असून पुढील तपास सहायक पोलिस निरीक्षक संदीप भारती हे करीत आहेत.

आपली प्रतिक्रिया द्या