सोसायटीत कुर्बानीचे बकरे आणणारा मिंधे गटाचा पदाधिकारी; मोहसीन खानविरोधात विनयभंगाचा गुन्हा

मीरारोडच्या जेपी इन्फ्रा सोसायटीत कुर्बानीसाठी बकरे आणणारा मोहसीन खान हा मिंधे गटाचा पदाधिकारी असल्याची माहिती उघड झाली आहे. कुर्बानीसाठी आणलेले बकरे बाहेर घेऊन जा, अशी मागणी करणाऱ्या रहिवाशांवर मोहसीन खान याने गुंडगिरी केली होती. महिलांशी अर्वाच्य भाषेत हुज्जत घालणाऱ्या मोहसीन खानवर काशिमीरा पोलिस ठाण्यात विनयभंगाचा गुन्हा दाखल झाला आहे.

जेपी इन्फ्रा सोसायटीत मोहसीन खान याने बकरी ईदच्या कुर्बानीसाठी दोन बकरे आणले होते. याविषयीची माहिती सोसायटीतील काही लोकांना मिळाली. त्यानंतर रहिवाशांनी इमारतीच्या गेटवर जमा होत कुर्बानीसाठी आणलेले बकरे घेऊन जा असे सांगितले. मात्र मोहसीन याने आपण शिंदे गटाचा दहिसर विभागातील प्रभाग क्रमांक 8 चा पदाधिकारी असल्याचे सांगत रहिवाशांवर दादागिरी केली होती. या दादागिरीला भीक न घालता रहिवाशांनी आंदोलन करत थेट हनुमान चालिसा पठण केले. तसेच जय श्रीरामचे नारेही लगावले. त्यामुळे चांगलाच तणाव वाढला. पोलिसांनी मध्यस्थी करत कारवाईचे आश्वासन दिल्यानंतर रहिवासी शांत झाले होते. यानंतर आज काशिमीरा पोलिसांनी सोसायटीतील एका महिलेच्या तक्रारीवरून मोहसीन खानविरोधात विनयभंगाचा गुन्हा दाखल केला.