ठरलेल्या जागेपेक्षा आठ एकर अधिक जागेचा वापर, विद्यापीठाने केलेली दंडाची कारवाईही संशयास्पद, फेरतपासणी करण्याची युवासेनेची मागणी
मुंबई मॅरेथॉनसाठी कालिना कॅम्पसमधील 2 एकर जागा वापरासाठी करार केला मात्र प्रत्यक्षात दहा एकर जागा वापरण्यात आली. ही बाब कुलगुरूंच्या निदर्शनास आणून दिल्यानंतर याप्रकरणी दंडात्मक कारवाई करण्याचे आदेश त्यांनी दिले, मात्र या दंडात्मक कारवाईवर युवासेनेने संशय व्यक्त केला आहे. 10 एकरऐवजी 7 एकर जागा दाखविण्यात आली आणि अतिरिक्त 5 एकर जागेला प्रति एकर प्रति दिन 25 हजार रुपये अशी दंडात्मक कारवाई करण्यात आली.
टाटा मुंबई मॅरेथॉन ही खासगी स्पर्धा होती. त्यासाठी विद्यापीठाच्या कालिना कॅम्पस येथील जागेचा व्यावसायिक कामासाठी वापर करण्यात आला होता. शिवसेना (उद्धव बाळासाहेब ठाकरे) युवासेनेने याला विरोध दर्शविला. करारानुसार विद्यापीठाची 2 एकर जागा वापरात येणार होती, मात्र या स्पर्धेसाठी 10 एकर जागेचा वापर झाला. ही बाब युवासेना माजी सिनेट सदस्य प्रदीप सावंत, राजन कोळंबेकर यांनी कुलगुरूंच्या निदर्शनास आणून दिली. युवासेनेच्या तक्रारीनंतर अतिरिक्त जागा वापरासाठी दंडात्मक कारवाई करण्यात आली. मात्र ही कारवाई चुकीची असल्याचा आरोप युवासेनेने केला असून जागेची फेरतपासणी करून नव्याने दंड आकारण्याची मागणी केली आहे.
विद्यापीठाने ठोठावलेला दंड
n विद्यापीठाने करारानुसार मुंबई मॅरेथॉनसाठी वापरास दिलेल्या दोन एकर जागेसाठी प्रति एकर प्रति दिन 50 हजार रुपये आकारण्यात आले. n मात्र दंडात्मक कारवाई करताना प्रति एकर प्रति दिन फक्त 25 हजार रुपये आकारण्यात आले. n वापरलेल्या जागेचे मोजमापदेखील चुकीचे झाले. किमान दहा एकर जागा वापरात आली, परंतु फक्त सात एकर जागा दाखविण्यात आली. n त्यानुसार अतिरिक्त ठरलेल्या पाच एकर जागेला दंड आकारण्यात आला. n हा दंडदेखील चार दिवसांसाठी आकारला. वास्तविक एकूण 12 दिवस जागेचा वापर झाला.
सदर कारवाई संशयास्पद
सदर कारवाई संशयास्पद असून यामध्ये कोणाचे तरी उखळ पांढरे झालेले दिसते. याची पुन्हा एकदा कसून चौकशी करून फेर दंडात्मक कारवाई तसेच त्यांच्यावर नाममात्र सकारात्मक कारवाई करण्याची सूचना करणाऱयांवर ठपका ठेवून कारवाई करावी, अशी मागणी युवासेना माजी सिनेट सदस्यांनी केली आहे.
