प्रबोधन गोरेगाव आणि साप्ताहिक ‘मार्मिक’ यांच्यातर्फे आयोजित साहित्य सेवक वसंत तावडे स्मृती कथा स्पर्धा 2025 चा निकाल जाहीर करण्यात आला. या स्पर्धेतील प्रथम क्रमांकाचा पुरस्कार डॉ. क्षमा शेलार लिखित ‘धुकं’ या कथेला प्राप्त झाला. 15 हजार रुपये असे या पुरस्काराचे स्वरूप आहे. ही कथा साप्ताहिक ‘मार्मिक’च्या दिवाळी अंकात प्रकाशित होणार आहे. पुरस्कार वितरण सोहळा लवकरच होणार आहे.
शिवसेना नेते व प्रबोधन गोरेगावचे संस्थापक सुभाष देसाई यांच्या मार्गदर्शनाखाली झालेल्या स्पर्धेत दुसरा पुरस्कार प्रभाकर मठपती यांच्या ‘शेकडा पाच’ या कथेला तर तिसरा पुरस्कार विनय खंडागळे यांच्या ‘टिचल्या बांगड्यांचं घर’ या कथेला मिळाला. योगिनी पाळंदे (नवीन नाते), प्रसाद खानोलकर (दुतोंडी अजगर), डॉ. मोनाली हर्षे (अट्टाहास) यांना उत्तेजनार्थ पुरस्कार जाहीर झाला. तसेच, प्राजक्ता प्रशांत आपटे लिखित ‘नाटक’ ही कथा स्पर्धेतील सर्वोत्तम विनोदी कथा ठरली.
या स्पर्धेला दीडशेपेक्षा अधिक कथा प्राप्त झाल्या. साप्ताहिक ‘मार्मिक’चे कार्यकारी संपादक मुकेश माचकर, विनोदी लेखक सॅबी परेरा आणि पत्रकार-कवी विनोद पितळे यांनी परीक्षक म्हणून भूमिका बजावली. प्राथमिक छाननी विजय नाडकर्णी, तर समन्वयाची जबाबदारी गोविंद गावडे यांनी पार पाडली.
