सणासुदीच्या दिवसांत नागपूर-मडगाव-नागपूर ही साप्ताहिक एक्स्प्रेस गाडी सुरू होती. त्याप्रमाणे या गणपती महोत्सवाच्या काळातसुद्धा ही गाडी सुरू केली गेली. त्यावेळी संमगेश्वर रोड स्थानकामध्ये या गाडीला थांबा होता. ही गाडी गेल्या 2 वर्षांपासून सुरू आहे. आता त्या गाडीला ऑक्टोबर 2022 पर्यंत मुदतवाढ देण्यात आली आहे. ही गाडी कायमस्वरूपी सुरू राहणार, असेही सांगितले जात होते, मात्र नुकताच या गाडीचा संगमेश्वर रोड थांबा काढण्यात आला.
नेत्रावती-मत्स्यगंधा या एक्स्प्रेस गाड्यांसाठी आम्ही आंदोलन केले होते. यावेळी स्वातंत्र्याच्या अमृत महोत्सवी वर्षात आंदोलन नको, अशी मान्यवर मंडळींनी विनंती केली म्हणून आम्ही आंदोलन मागे घेतले; परंतु कोकण रेल्वेचा कोकणाबद्दल दुजाभाव सुरूच आहे तसेच नागपूर-मडगाव-नागपूर गाडीचा संगमेश्वर रोड स्थानकातील थांबा काढण्यामागचे नेमके कारण काय आहे ते समजू शकले नाही. त्यामुळे संपूर्ण संगमेश्वर तालुक्यात नाराजीचे वातावरण पसरले आहे. आता आंदोलनासाठी जनमताचा रेटा वाढू लागला आहे. कोकण रेल्वेसोबत पत्रव्यवहार झाला आहे.
मात्र आम्हाला सकारात्मक प्रतिसाद मिळाला नाही तसेच मागणी मान्य झाली नाही, तर परत एकदा उपोषण आणि आंदोलन करावे लागेल. त्यामुळे होणार्‍या परिणामाला कोकण रेल्वेच जबाबदार असेल, असे संदेश जिमन यांनी म्हटले आहे.
