‘जिलबी’… नाव उच्चारलं तरी तोंडाला पाणी सुटतं. अशीच एक लज्जतदार ‘जिलबी’ आपला मनाचा गोडवा वाढविण्यासाठी आपल्या भेटीला येणार आहे. अभिनेता प्रसाद ओक, स्वप्निल जोशी, शिवानी सुर्वे, पर्ण पेठे, गणेश यादव, प्रणव रावराणे, अश्विनी चावरे, प्रियांका भट्टाचार्य या कलाकारांच्या अभिनयाने सजलेली ‘जिलबी’ या चित्रपटाच्या चित्रीकरणाला नुकतीच सुरुवात झाली.
वेगवेगळ्या आशय विषयाचे अभिरुचीसंपन्न चित्रपट मराठीत येत आहेत. ‘जिलबी’ चित्रपट नावापासूनच वेगळा ठरत आहे. आनंद पंडित मोशन पिक्चर यांची निर्मिती असलेल्या ‘जिलबी’ चित्रपटाचे दिग्दर्शन नितीन कांबळे यांचे आहे. आम्ही आणलेली ही ‘जिलबी’ तिचा गोडवा प्रेक्षकांच्या मनात नक्कीच उतरेल असा विश्वास दिग्दर्शक नितीन कांबळे यांनी व्यक्त केला. ‘जिलबी’ चित्रपटाची कथा-पटकथा-संवाद मच्छिंद्र बुगडे यांचे आहेत.
