गतिमंद आणि मूकबधीर तरूणीचे अपहरण करून बलात्कार

सामना ऑनलाईन, कोपरगाव

एका वासनांध तरूणाने गतिमंद आणि मूकबधीर तरूणीच्या असहाय्यतेचा फायदा उचलत तिच्यावर बलात्कार केल्याची संतापजनक घटना कोपरगावमध्ये घडली आहे. रविंद्र मोरे असं या नराधमाचं नाव आहे. त्याने सोमवारी म्हणजे ३ जुलैच्या रात्री ८च्या सुमारास पिडीतेचं अपहरण केलं आणि तिच्यावर एका मंदिराच्या परिसरात रात्रभर अत्याचार केले. यानंतर त्याने या तरूणीला मंगळवारी सकाळी सहावाजता घराजवळ सोडून दिलं. या तरूणीने हातवारे करत घडलेला प्रकार तिच्या आईला सांगितला. मुलीवर झालेल्या अत्याचाराबद्दल कळताच त्या आईच्या पायाखालची जमीनच सरकली. कसाबसा धीर एकवटत पिडीत तरूणीच्या आईवडीलांनी पोलीस स्टेशन गाठलं आणि तक्रार नोंदवली

घडलेला प्रकार ग्रामस्थांना कळताच, त्यांच्या संतापाचा उद्रेक झाला. पोलीस स्टेशनबाहेर मोठ्या संख्येने हे प्रक्षुब्ध ग्रामस्थ जमा झाले. त्यांची समजूत काढता काढता पोलिसांच्या नाकात दम आला होता. पोलिसांनी रविंद्र मोरेला बेड्या ठोकल्याचं सांगत ग्रामस्थांचा राग शांत करण्याचा प्रयत्न केला. मात्र अजूनही कोपरगाव शहरातील माधवनगर भागात तणावाचं वातावरण आहे. पोलिसांनी घटनेचे गांभीर्य लक्षात घेवून पोलीस बंदोबस्त वाढवला आहे. पोलिसांनी रविंद्रसोबत इतरही कोणी या तरूणीवर अत्याचार केले आहेत का याचा शोध घ्यायला सुरूवात केली आहे.

आपली प्रतिक्रिया द्या