किल्ल्यांना चंगळवादी संस्कृतीच्या हवाली करणाऱ्यांना जनता दाराशीही उभे करणार नाही – शरद पवार

महाराष्ट्रातील जे किल्ले छत्रपती शिवरायांच्या शौर्याची, पराक्रमाची आणि सर्वधर्मसमभावाच्या नीतीची साक्ष देत आहेत, त्या किल्ल्यांवर चंगळवादी संस्कृती उभी करु पाहणाऱ्यांना आता जनता दाराशीही उभे करणार नाही, अशा शब्दात नांदेड येथे बोलतांना राष्ट्रवादी काँग्रेसचे अध्यक्ष शरद पवार यांनी सरकारवर टीका केली.

राष्ट्रवादी काँग्रेसच्या कार्यकर्त्यांच्या मेळाव्यात मार्गदर्शन करताना ते बोलत होते. व्यासपीठावर धनंजय मुंडे, आमदार प्रदीप नाईक, माजी आमदार शंकरअण्णा धोंडगे, माजी खासदार गंगाधर कुंटूरकर, माजी मंत्री कमलकिशोर कदम, पत्रकार मधुकर भावे, रामनारायण काबरा, शहराध्यक्ष डॉ.सुनील कदम, गोविंद तेहरा, जि.प. उपाध्यक्ष समाधान जाधव आदी उपस्थित होते.

शरद पवार पुढे म्हणाले की, सध्या राज्यात शेतकऱ्यांची स्थिती अतिशय दयनीय आहे. शेतकऱ्यांपुढे कोरड्या आणि ओल्या दुष्काळाचे संकट उभे राहत आहे. एकीकडे हातचे पीक गेले आणि दुसरीकडे कर्ज वाढत गेले अशी स्थिती झाल्याने शेतकऱ्यांसमोर आत्महत्येशिवाय पर्याय उरत नाही. गेल्या वर्षभरात बारा हजार शेतकऱ्यांनी नापिकी आणि कर्जबाजारीला कंटाळून आत्महत्या केली आहे. याकडे सध्याच्या सरकारचे लक्ष नाही, शेतकऱ्यांशी त्यांना काहीही घेणे देणे नाही.

एकट्या नाशिक शहरातील ५४ उद्योग बंद झाले असून १६ हजार कामगारांची नोकरी गेली आहे, असे सांगून शरद पवार म्हणाले की, या सरकारने बेकारी वाढवली आहे. बेरोजगार युवक या सरकारला माफ करणार नाही.

विरोधी पक्षनेते धनंजय मुंडे म्हणाले की, अमित शहा विचारतात ५० वर्षात शरद पवारांनी काय काम केले. शहा साहेबांना माझे एवढेच सांगणे आहे की, शरद पवारांनी आपल्या कारकीर्दीत देशात जेवढी विमानतळे उभारली तेवढी तुमच्या गुजरातमध्ये तुम्ही बसस्थानकेही उभारली नाहीत.

यावेळी ज्येष्ठ पत्रकार मधुकर भावे, कमलकिशोर कदम, डॉ.सुनील कदम यांनीही यावेळी मनोगत व्यक्त केली.

चौफुल्यातही छमछम आणि भोकरफाट्यातही छमछम

ज्या किल्ल्यांच्या दर्शनामधून तरुणांना शौर्याचा आणि पराक्रमाचा इतिहास माहिती करुन देवून त्यांना प्रेरणा मिळेल असे काही करण्याऐवजी सध्याचे सरकार या किल्ल्यांवर छमछमची व्यवस्था करण्याचा प्रयत्न  करीत आहे, असा आरोप शरद पवार यांनी केला. आमच्या पुणे जिल्ह्यातील चौफुला येथे असेच छमछमचे आवाज येतात. नांदेड जिल्ह्यातील भोकर फाट्यावरही छमछम छमछमचा आवाज येतो आहे, या शरद पवारांच्या वाक्यावर सभागृहात  हंशा पिकला.

आपली प्रतिक्रिया द्या