सिंधुदुर्गात मुंबईतून आलेल्या कोरोनाबाधित रुग्णाचा मृत्यू

505

देवगड तालुक्यातील टेंबवली येथील 79 वर्षीय कोरोनाबाधित महिलेचा मृत्यू झाला आहे. सदर महिला दिनांक 19 मे रोजी मुंबई येथून जिल्ह्यात आली होती. त्यानंतर तिला दुसऱ्या दिवशी रुग्णालयामध्ये दाखल करून तिचा स्वॅब तपासणीसाठी घेण्यात आला होता. दिनांक 23 मे 2020 रोजी तिचा मृत्यू झाला होता. तिचा कोरोना चाचणी अहवाल आज पॉझिटीव्ह आला आहे. तिला उच्च रक्तदाब व जुना श्वसनाचा आजार होता.

आज प्राप्त झालेल्या अहवालानुसार जिल्ह्यात आढळलेल्या कोरोना बाधित रुग्णांची माहिती पुढील प्रमाणे आहे. कणकवली तालुक्यातील बावशी येथील एक, कुडाळ तालुक्यातील कवठी येथील एक, देवगड तालुक्यातील वाडा येथील एक, वेंगुर्ला तालुक्यातील मातोंड येथील एक आणि सावंतवाडी तालुक्यातील बांदा येथील एक आणि देवगड तालुक्यातील टेंबवली येथील मृत्यू झालेल्या महिलेचा एक असे एकूण 6 अहवाल पॉझिटीव्ह आले आहेत.

त्यामुळे जिल्ह्यातील रुग्णांची एकूण संख्या 30 इतकी झाली आहे. या पैकी 7 रुग्ण बरे होऊन घरी गेले आहेत. तर एका रुग्णाचा मृत्यू झाला आहे. 22 रुग्णांवर उपचार सुरू आहेत. नव्याने कोरोना बाधित आढळलेल्या रुग्णांच्या संपर्कातील व्यक्तींचा शोध घेण्याचे काम युद्धपातळीवर सुरू आहे. या सर्व रुग्णांनी मुंबई येथून प्रवास केला आहे.

आपली प्रतिक्रिया द्या