एका छोटय़ाशा ठिणगीनं आयुष्याला लखलख लाइटिंग कसं होतं याची गोष्ट सांगणारा ‘बटरफ्लाय’ हा चित्रपट येत्या 2 जूनला प्रदर्शित होणार आहे. नुकतेच या चित्रपटातील ‘कोरी कोरी झिंग हाय गं’ असे रंजक शब्द असलेले गीत सोशल मीडियावर लॉन्च करण्यात आले आहे. वैभव जोशी यांनी लिहिलेल्या या गाण्याला शुभाजित मुखर्जी यांनी संगीतबद्ध केले असून वैशाली भैसने माडे हिने गायले आहे.
आपल्या प्रत्येकाचं एक दैनंदिन आयुष्य हे ठरलेलं असतं आणि आपण तसंच ते जगत असतो, पण एक दिवस मेघाच्या आयुष्यात एक अशी रंजक गोष्ट घडते, ज्यामुळे तिचं दैनंदिन आयुष्य बदलून जाते. तिला सापडलेल्या एका नवीन वाटेला आणि स्वतःला ती अधिक प्राधान्य देते. आयुष्याला लखलख लाइटिंग झाल्यामुळे कोषातून बाहेर पडून जगणाऱ्या तिची गोष्ट म्हणजेच ‘बटरफ्लाय’. या चित्रपटात मधुरा वेलणकर साटम, अभिजित साटम, महेश मांजरेकर, राधा धारणे, सोनिया परचुरे, प्रदीप वेलणकर यांनी काम केले आहे.
