लॉरेन्स बिष्णोई टोळीकडून अभिनेता सलमान खानला सातत्याने जीवे मारण्याच्या धमक्या मिळत आहेत. त्यामुळे त्याच्या सुरक्षेत वाढ करण्यात आली आहे. अशातच सलमानच्या चित्रपटाच्या सेटवर बुधवारी एक अनोळखी व्यक्ती घुसल्याचा प्रकार समोर आला आहे. या संशयित व्यक्तीकडे विचारपूस केली असता लॉरेन्स बिष्णोईला सांगू का, अशी धमकी त्याने दिली. दरम्यान, या व्यक्तीला शिवाजी पार्क पोलिसांनी ताब्यात घेतले असून त्याची कसून चौकशी सुरू आहे.
मिळालेल्या माहितीनुसार, सलमान खानच्या चित्रपटाचे सध्या दादर येथे शूटिंग सुरु आहे. या चित्रपटाच्या सेटवर एक अनोळखी व्यक्ती संशयास्पद वावरताना दिसली. सेटवरील क्रू मेंबरने त्याची चौकशी केली असता त्याने बिष्णोईच्या नावाची धमकी दिली. त्यामुळे एकच खळबळ उडाली. त्यानंतर क्रू मेंबरने त्या व्यक्तीला पोलिसांच्या ताब्यात दिले. दरम्यान या प्रकारामुळे सलमानच्या सुरक्षेचा प्रश्न पुन्हा ऐरणीवर आला आहे. पोलिसांनी दिलेल्या माहितीनुसार अटक करण्यात आलेली व्यक्ती ही ज्युनियर आर्टिस्ट असून त्याने सेटवर बाऊन्सरसोबत हुज्जत घालत बिष्णोईचे नाव घेतले. शिवाजी पार्क पोलीस त्याची कसून चौकशी करत आहेत.
