आगामी विधानसभा निवडणुकीच्या पार्श्वभूमीवर केंद्रीय निवडणूक आयोगाने राजकीय पक्षांना निवडणूक चिन्हांचे वाटप केले असून वंचित बहुजन आघाडीला गॅस सिलिंडर तर माजी राज्यमंत्री बच्चू कडू यांच्या नेतृत्वाखालील प्रहार जनशक्ती पक्षाला बॅट हे निवडणूक चिन्ह मिळाले आहे.
निवडणूक आयोगाने आज निवडणूक चिन्हाबाबतची घोषणा केली. नुकत्याच पार पडलेल्या लोकसभा निवडणुकीत वंचित बहुजन आघाडीच्या उमेदवारांना वेगवेगळ्या निवडणूक चिन्हावर लढावे लागले होते. पक्षाचे नेते प्रकाश आंबेडकर यांना अकोला लोकसभा मतदारसंघात प्रेशर कुकर हे चिन्ह मिळाले होते. त्यामुळे आंबेडकर यांनी मध्यंतरी नवी दिल्लीत जाऊन विधानसभा निवडणुकीला गॅस सिलिंडर हे निवडणूक चिन्ह देण्याची विनंती केली होती.
