अनोळखी नंबरवरून आलेल्या कॉलमुळे चमकले महिलेचे नशीब!

अनोळखी क्रमांकावरून आलेल्या कॉलमुळे फसवणूक झाल्याच्या आजवर आपण अनेक घटना ऐकल्या आहेत. त्यामुळे बहुतेक जण अनोळखी क्रमांकावरून आलेले कॉल उचलणे टाळतात. वारंवार फोनवर येणाऱया याच अनोळखी कॉलमुळे मात्र ऑस्ट्रेलियातील एका महिलेचे भाग्य उजळले आहे. या महिलेला तब्बल अकरा कोटी रुपयांचा जॅकपॉट लागल्याची आनंदवार्ता देणारा हा फोन होता.

झाले असे की, ऑस्ट्रेलियातील तास्मानियामध्ये राहणाऱया एका महिलेला वारंवार अनोळखी नंबरवरून कॉल येत होते. स्क@मर्सचे कॉल्स असतील म्हणून तिने हे फोन उचलणे टाळले. अनेकदा फोन कट करूनही तिला वारंवार फोन येऊ लागले. शेवटी वैतागून महिलेने आपल्याला विनाकारण कोण त्रास देतोय हे जाणून घेण्यासाठी फोन उचलला. हा फोन उचलताच महिलेला आश्चर्याचा धक्का बसला. कारण त्या महिलेला तब्बल 11 कोटी रुपयांची लॉटरी लागली होती. या महिलेने वेस्टबरी फेस्टिव्हलमध्ये लॉटो आउटलेटवरून लॉटरीचे तिकीट खरेदी केले होते. याबाबत ती महिला म्हणाली, ‘‘शक्यतो मी अनोळखी क्रमांकावरून आलेले कॉल्स उचलत नाही, कारण ते कॉल्स फसवणुकीसाठी केलेले असतात असा माझा समज आहे. परंतु इतक्यांदा कोण कॉल करतेय हे जाणून घेण्यासाठी मी रागात फोन उचलला. पण याच फोनमुळे माझे भाग्य उजळले आहे.’’

 

आपली प्रतिक्रिया द्या