सात घरफोडी करणाऱ्या सराईताला अटक; 6 लाख 43 हजारांचा ऐवज जप्त, युनीट पाचची कामगिरी

पुणे शहरासह ग्रामीण भागात घरफोडी करणाऱ्या सराईताला गुन्हे शाखेच्या युनीट पाचने अटक केली. त्याच्याकडून सात घरफोडीचे गुन्हे उघडकीस आणून साडेसहा लाखांचा ऐवज जप्त केला आहे. त्याने दुचाकी, मोटार चोरी, शेळी-मेंढया चोरणे, घरफोडीचे गुन्हे केल्याचे उघडकीस आले आहे. अजयसिंग अर्जुनसिंग दुधानी (वय 20, रा. भापकर वस्ती, मांजरी बुद्रुक) असे अटक केलेल्याचे नाव आहे.

फुरसुंगी परिसरात एकाच रात्री तीन दुकाने फोडून चोरी झाल्याप्रकरणी युनीट पाचकडून आरोपीचा शोध घेण्यात येत होता. त्यासाठी पथकाने परिसरातील 15 किलोमीटर अंतरावरील सीसीटीव्ही फुटेजची पाहणी केली. त्यानुसार आरोपीची माहिती काढून त्याला मांजरी बुद्रूक परिसरात चोरीची गाडी आणि हत्यारांसह ताब्यात घेतले. चौकशीत त्याने मौजमजेसाठी पैसे लागत असल्यामुळे साथीदारांच्या मदतीने लोणीकाळभोर परिसरातून मोटार चोरल्याची कबुली दिली. ही कामगिरी उपायुक्त श्रीनिवास घाडगे, एसीपी नारायण शिरगावकर, पोलीस निरीक्षक हेमंत पाटील, एपीआय कृष्णा बाबर, विनोद शिवले, अकबर शेख, प्रमोद टिळेकर, रमेश साबळे, दया शेगर, दाऊद सय्यद, प्रविण काळभोर, आश्रुबा मोराळे, चेतन चव्हाण, स्वाती गावडे यांनी केली.

चोरीच्या मोटारीतून प्रवास करून घरफोडी
चोरलेल्या मोटारीतून प्रवास करून अजयसिंगने कोंढवा, हडपसर, लोणी-काळभोर, यवत परिसरात घरफोडी आणि वाहन चोरीचे गुन्हे केल्याची कबुली दिली आहे. त्याच्याकडून दुचाकी, मोटार, सोन्या-चांदीचे दागिने असा 6 लाख 43 हजारांचा ऐवज जप्त केल्याची माहिती पोलीस निरीक्षक हेमंत पाटील यांनी दिली.