मुंबईत अतिवृष्टीमुळे सखल भागात पाणी तुंबू नये, यासाठी मुंबई महापालिकेने नालेसफाईच्या कामाला सुरुवात केली असून त्यासाठी एकूण 180 कोटी रुपये खर्च करणार आहे. पावसाळय़ात पूर्व व पश्चिम महामार्गावरील प्रवास बिनदिक्कत व्हावा, यासाठी त्याखालील नालेसफाईवर विशेष लक्ष ठेवले जाणार असून त्यासाठी 11 कोटी रुपये खर्च केले जाणार आहेत.
एमएमआरडीएने मुंबई महापालिकेकडे पूर्व आणि पश्चिम द्रुतगती महामार्ग 3 ऑक्टोबर 2022 रोजी हस्तांतरित केले. महापालिकेच्या ताब्यात आल्याने पूर्व आणि पश्चिम द्रुतगती महामार्गाखालील नाल्यातील गाळ आता महापालिका काढणार आहे. पश्चिमउपनगरांमधील पश्चिम द्रुतगती महामार्गावरील विविध छोटे-मोठे नाले, पेटिका नाले तसेच रस्त्यालगत पावसाळी पाणी वाहून नेणाऱया पर्जन्यवाहिन्यांमध्ये वाहून येणारी माती, घाण, कचरा आदी जमा होतो. पावसाळी पाणी वाहून नेणाऱया वाहिन्यांमधून सांडपाणी व काही प्रमाणात मल वाहून नेला जात असला तरी याचा निचरा योग्य प्रकारे होत नाही. त्याची सफाई केली जाणार आहे तर पूर्व द्रुतगती महामार्गावर 16 मोरी पेटिका म्हणजे कल्व्हर्ट असून या मार्गावरील पाण्याचा निचरा योग्य प्रकारे होण्यासाठी यातील गाळाची सफाई केली जाणार आहे.
सफाईसाठी पाच निविदा
दोन्ही मार्गावरील कल्व्हर्टची सफाई करण्यासाठी पालिकेने यंदा स्वतंत्र निविदा मागवल्या होत्या. यासाठी पूर्व उपनगरांसाठी दोन निविदा आणि पश्चिम उपनगरांसाठी तीन अशा प्रकारे पाच निविदा मागवण्यात आल्या. यासाठी पाच स्वतंत्र पंत्राटदारांची निवड करण्यात आली आहे.
