पुनर्वसित गावांचे प्रश्न निकाली काढण्यासाठी पुनर्वसन धोरण आणणार – विजय वडेट्टीवार

पुनर्वसित गावांचे असलेले प्रश्न कायमचे निकाली निघावेत यासाठी पुनर्वसन धोरण लवकरच आणणार असल्याची माहिती राज्याचे आपत्ती व्यवस्थापन, मदत व पुनर्वसन मंत्री विजय वडेट्टीवार यांनी दिली. इतर मागास बहुजन कल्याण विभाग, आपत्ती व्यवस्थापन व मुदत व पुनर्वसन विभागाची आढावा बैठक जिल्हाधिकारी कार्यालयाच्या सभागृहात आयोजित करण्यात आली होती. त्यावेळी उपस्थित अधिकाऱ्यांना मार्गदर्शन करताना वडेट्टीवार बोलत होते.

मंत्री वडेट्टीवार म्हणाले, गेली अनेक वर्षे पुनर्वसन धोरण नसल्याने पुनर्वसित गावांना अनेक समस्यांचा सामना करावा लागत होता. पुनर्वसित गावांचे असेलेले प्रश्न कायमचे निकाली निघावेत, या दृष्टीकोनातून पुनर्वसन धोरण तयार करण्यात आले असून या धोरणास मंजुरी मिळण्यासाठी येत्या आठवडाभरात मंत्रिमंडळाच्या बैठकीमध्ये ठेवण्यात येणार आहे.

जमीन खरेदीपासून ते गावांच्या सर्व नागरी सुविधापर्यंतचे अधिकार जिल्हाधिकाऱ्यांना देण्यात येणार असल्याने पुनर्वसित गावांचे प्रश्न कायमचे निकाली निघणार असल्याचेही त्यांनी यावेळी सांगितले.

अतिवृष्टीने बाधित झालेल्या शेतपिकाच्या नुकसान भरपाईसाठी 10 हजार कोटी रुपयांचे पॅकेज देण्यात आले होते. त्यापैकी 522 कोटी रुपयांचा सर्वाधिक निधी जालना जिल्ह्यासाठी देण्यात आला होता. या निधीपैकी 460 कोटी रुपयांचे वितरण करण्यात आले असून उर्वरित निधीही नुकसानग्रस्तांना तातडीने वितरित करण्याचे निर्देशही मंत्री वडेट्टीवार यांनी जिल्हा प्रशासनाला यावेळी दिले.

कोरोना महामारीच्या काळामध्ये जालना जिल्ह्यात जिल्हा प्रशासन व आरोग्य यंत्रणेने अत्यंत संवेदनशीलपणे काम करत अत्यंत उत्कृष्टपणे परिस्थिती हाताळली. याबद्दल प्रशासनातील सर्व अधिकारी व आरोग्य सेवेतील प्रत्येकाचे कौतुक करत येणाऱ्या काळातही सर्वसामान्यांना आरोग्यसेवा अधिक चांगल्या प्रमाणात देण्यात याव्यात. कोरोना आपत्ती व्यवस्थापनाच्या माध्यमातून जिल्ह्याला साडेबारा कोटी रुपये उपलब्ध करुन देण्यात आले होते. आरोग्य सेवा बळकटीकरणासाठी अतिरिक्त निधी लागल्यास तसा प्रस्ताव सादर करण्यात यावा, तो उपलब्ध करुन देण्यात येईल, असेही मदत व पुनर्वसन मंत्री विजय वडेट्टीवार यांनी यावेळी सांगितले.

यावेळी जिल्हाधिकारी रविंद्र बिनवडे यांनी कोविड -19, पुनर्वसन विभाग, पशुसंवर्धन, नुकसान भरपाई आदीबाबत पॉवर पॉईंटच्या माध्यमातून माहिती दिली. यावेळी आमदार संजय दौंड, जिल्हाधिकारी रविंद्र बिनवडे, जिल्हा परिषदेच्या मुख्य कार्यकारी अधिकारी निमा अरोरा, निवासी उपजिल्हाधिकारी केशव नेटके, उपजिल्हाधिकारी अजंली कानडे,उपमुख्य कार्यकारी अधिकारी केंद्रे, जिल्हा शल्य चिकित्सक डॉ. अर्चना भोसले, जिल्हा आरोग्य अधिकारी डॉ. विवेक खतगावकर, अतिरिक्त जिल्हा आरोग्य अधिकारी डॉ. संतोष कडले, यांच्यासह संबंधित विभागाचे प्रमुख अधिकारी उपस्थित होते.

आपली प्रतिक्रिया द्या