लांबचा प्रवास करताना उलट्या किंवा मळमळ होणं हे अत्यंत त्रासदायक असतं. यामुळे प्रवासाचा आनंद मनमुराद घेता येत नाही. यामुळे शारीरिक त्रासही सहन करावा लागतो. बस, कार, जहाज, विमान अशा प्रकारे कोणत्याही वाहनाने प्रवास केला तरीही काही जणांना त्रास होतोच. तसेच काही वेळा प्रवसादरम्यान बाहेर वेगवेगळ्या ठिकाणी खाल्ले जाते. कधी गाड्यांमधून, कधी कॅन्टीनमधून, कधी छोट्या दुकानातून किंवा खाद्यपदार्थांच्या गाड्या आणि ढाब्यांमधून मिळणारे पदार्थ खाण्यात येतात. यामुळे आम्लपित्त, जीव घाबरणे असेही त्रास होऊ शकतात. गाडी किंवा बसमध्ये जास्त प्रवास केला, तरीही उलटी येत असल्यासारखे वाटू लागते, अशा वेळी काही सोपे उपाय करून उलट्यांचा त्रास थांबवता येऊ शकतो. - प्रवासावेळी उलटीसारखे होत आहे, असे वाटत असल्यास आल्याचा तुकडा तोंडात ठेवून चघळावा. हा उपाय उलटी थांबवण्यासाठी गुणकारी आहे. - लिंबू चोखल्याने उलटी थांबायला मदत होते. - प्रवासामुळे होणारी मळमळ किंवा आम्लपित्ताचा त्रास टाळण्यासाठी एक चमचा लवंगा एक कप गरम पाण्यात उकळा. हे पाणी गाळून प्या. यामुळे प्रवासाआधी हा उपाय केल्यास उलट्या थांबण्यासाठी फायदा होतो. - प्रवास करताना उलटी होत असल्याची जाणीव होत असल्यास लिंबाचा रस घातलेले पाणी थोड्या थोड्या वेळाने पित राहा. एकाच वेळी भरपूर पाणी पिऊ नका. यामुळे उलटी होऊ शकते. - दीर्घ श्वास घ्या आणि आयुष्यातले काही चांगले क्षण आठवण्याचा प्रयत्न करा. प्रवासावेळी उलटी होत असल्याची जाणीव झाल्यावर हा उपाय परिणामकारक ठरतो. - संत्र्याचा रस प्या किंवा संत्र खा. यामुळे उलटी, मळमळ होणे असे त्रास बंद व्हायला मदत होते. - एक चमचा बडीशेप एक कप पाण्यात 10 मिनिटे उकळा. हे पाणी थंड झाल्यावर प्यायल्याने उलटी थांबते. - मीठ, साखर घातलेले पाणी प्यायल्याने उलटीपासून आराम मिळतो.
