नाशिक जिल्ह्यातल्या सिन्नर तालुक्यातील नांदुर शिंगोटे येथे भाजपचे दिवंगत नेते गोपीनाथ मुंडे यांच्या स्मारकाचे आणि पूर्णाकृती पुतळ्याचे लोकार्पण झाले. या कार्यक्रमाला राज्यातल्या तसेच केंद्रातल्या अनेक मोठ्या नेत्यांनी हजेरी लावली होती. यावेळी माजी मंत्री आणि आमदार पंकजा मुंडेदेखील उपस्थित होत्या. लोकार्पणाच्या कार्यक्रमावेळी भाषणादरम्यान मुंडे यांनी आता आम्ही कुणासमोर झुकणार नाही असे म्हणाल्या. त्यांच्या या वक्तव्याची राजकीय वर्तुळात चर्चा होत आहे.
पंकजा मुंडे यांचे भाषण सुरू झाल्यावर पावसाची रिमझिम झाली. पाऊस सुरू होताच पंकजा म्हणाल्या की, मागे आपण भगवातन भक्ती गडावर गेलो तिथे जोरदार पावसाने हजेरी लावली होती. गोपीनाथ गडावर कार्यक्रम झाले तिथेही पावसाने हजेरी लावली. हा सतत येणारा पाऊस येत्या दिवसांसाठी शुभ शकून घेऊन येत आहेत. या पावसाच्या प्रत्येक थेंबात ज्वाला आहे. ही ज्वाला तुमच्यातही आहे. आता आम्ही थकणार नाही. आता आम्ही रुकणार नाही. आम्ही कुणासमोरही कशासाठीही झुकणार नाही, असे त्यांनी सांगितले. त्यांना यातून नेमके काय म्हणायचे आहे. त्यांच्या रोख नेमका कोणावर आहे. तसेच त्यांनी या वक्तव्यातून काय संकेत दिले आहेत, याची राजकीय वर्तुळात चर्चा सुरू आहे.
पंकजा मुंडे म्हणाल्या की, आम्ही कुणासमोर कधी झुकणार नाही, तेव्हा त्यांचा रोख नेमका कोणाकडे होता असा प्रश्न अनेकांना पडला आहे. पंकजा यांना पक्षात डावलले जात असल्याचे त्यांच्या समर्थकांचे म्हणणे आहे. तसेच त्या पक्षावर नाराज असल्याच्या चर्चाही सुरू आहेत. या पार्श्वभूमीवर त्यांच्या वक्तव्याचा नेमका रोख कोणाकडे होता आणि त्यातून त्यांना काय संकेत द्यायचे आहेत, याबाबतच्या राजकीय चर्चा सुरू आहेत.
