चीनमधील वुहान शहरात रोबोटॅक्सीच्या यंत्रणेत झालेल्या मोठ्या बिघाडामुळे एकच गोंधळ उडाला. मंगळवारी तांत्रिक बिघाड झाल्याने 100 हून अधिक ड्रायव्हरलेस टॅक्सी रस्त्याच्या मध्यभागी अचानक थांबल्या. यामुळे शहरात मोठी वाहतूक कोंडी झाली असून, सोशल मीडियावर याचे अनेक व्हिडिओ व्हायरल झाले आहेत. या घटनेमुळे जगभरातील स्वयंचलित गाड्यांच्या सुरक्षेवर पुन्हा एकदा प्रश्नचिन्ह निर्माण झाले आहे.
स्थानिक पोलिसांनी दिलेल्या प्राथमिक माहितीनुसार, ‘सिस्टम मधील तांत्रिक बिघाडामुळे’ या सर्व गाड्या एकाच वेळी थांबल्या होत्या. एका व्हायरल व्हिडिओमध्ये या बिघाडामुळे महामार्गावर अपघात झाल्याचेही दिसत आहे. सुदैवाने, या घटनेत कोणतीही जीवितहानी झाली नसून सर्व प्रवासी सुखरूप बाहेर पडल्याचे प्रशासनाने स्पष्ट केले आहे. या प्रकरणाचा तपास अद्याप सुरू आहे.
A “system failure” took down multiple Baidu Apollo Go robotaxis in Wuhan 🇨🇳—cars stalled, roads blocked, and safety concerns back in the spotlight.
When a single glitch can paralyze the system, this isn’t ready for a real-world rollout. pic.twitter.com/3ycXIJyhIf
— WarrenVsCCP | 🇺🇸🇹🇼🇺🇸 (@WarrenVsCCP) April 3, 2026
हा तांत्रिक बिघाड चिनी तंत्रज्ञान कंपनी ‘बायडू’ (Baidu) च्या ‘अपोलो गो’ (Apollo Go) या सेवेमध्ये झाला. बायडू ही टॅक्सी सेवा चीनसह जगातील अनेक शहरांमध्ये चालवते. डिसेंबर 2025 मध्ये ‘उबेर’ (Uber) आणि ‘लिफ्ट’ (Lyft) या कंपन्यांनी ब्रिटनमध्ये या गाड्यांच्या चाचणीसाठी बायडूसोबत भागीदारी केली आहे. मात्र, या ताज्या बिघाडामुळे आता या गाड्यांच्या वापरापूर्वी त्यांची कडक तपासणी केली जाण्याची शक्यता आहे.
तज्ज्ञांच्या मते, स्वयंचलित वाहने ही मानवी चालकांपेक्षा सरासरीने सुरक्षित असू शकतात, परंतु या घटनेने अशा वाहनांच्या तांत्रिक मर्यादा उघड केल्या आहेत. युनिव्हर्सिटी कॉलेज लंडनचे प्राध्यापक जॅक स्टिलगो यांच्या मते, “जर आपल्याला या तंत्रज्ञानाचा सुरक्षित वापर करायचा असेल, तर या नवीन प्रकारच्या तांत्रिक धोक्यांचा सखोल अभ्यास करणे आवश्यक आहे.”
स्वयंचलित गाड्यांमध्ये बिघाड होण्याची ही पहिलीच वेळ नाही. यापूर्वी ऑगस्ट २०२५ मध्ये चोंगकिंगमध्ये एक रोबोटॅक्सी थेट एका बांधकामाच्या खड्ड्यात पडली होती, तर डिसेंबर २०२५ मध्ये सॅन फ्रान्सिस्कोमध्ये वीज पुरवठा खंडित झाल्यामुळे ‘वेमो’ (Waymo) टॅक्सींचा अशाच प्रकारे खोळंबा झाला होता. या सातत्याने होणाऱ्या घटनांमुळे जगभरात ड्रायव्हरलेस गाड्यांच्या सुरक्षिततेबद्दल चिंतेचे वातावरण निर्माण झाले आहे.
