बीड जिल्ह्यातील मस्साजोगचे सरपंच संतोष देशमुख हत्या प्रकरणातील आरोपी आणि अवैध धंद्यांचा ‘आका’ म्हणून ओळखला जाणारा वाल्मीक कराड याची बार्शीत सुमारे दीड कोटी रुपयांची शेतजमीन असल्याचे उघडकीस आले आहे. ही शेतजमीन जाधव नावाच्या महिलेच्या नावाने जुलै २०२४ मध्ये खरेदी करण्यात आली आहे.
सामाजिक कार्यकर्त्या अंजली दमानिया यांनी ही शेतजमीन वाल्मीक कराडची असल्याचे सोशल मीडियावर व्हायरल केले आहे. त्यामुळे बीड, पुणे ते सोलापूर असे कराडचे कनेक्शन उघड झाल्याने खळबळ उडाली आहे.
बार्शी तालुक्यातील शेंद्री या गावात मंगल जाधव या महिलेच्या नावे चार जमिनींचा सातबारा उतारा आढळला आहे. सुमारे ३५ एकर जमीन असून, याची किंमत दीड कोटी असल्याचे सांगण्यात येते. ही जमीन पाहण्यासाठी येथे सहा-सात सालगडी ठेवण्यात आले आहेत. यातील काहीजणांना पगार न मिळाल्याने सोडून गेले असून, येथे सध्या तिघेजण काम करतात. परंतु, त्यांनाही गेल्या तीन ते चार महिन्यांपासून पगार दिलेला नाही. त्यामुळे दुसऱ्याच्या शेतात काम करून हे सालगडी कराडची शेती सांभाळत असल्याचे चित्र समोर आले आहे.
