महाराष्ट्र राज्य मार्ग परिवहन महामंडळातील 87 हजार कर्मचारी व अधिकारी यांच्या पगारातून कपात केलेली 1240 कोटी रुपयांची रक्कम एसटीने पीएफ ट्रस्टमध्ये भरली नसल्याने गुंतवणुकीवरील अंदाजे 100 कोटी रुपये इतकी व्याजाची रक्कम बुडाल्याची माहिती महाराष्ट्र एसटी कर्मचारी काँग्रेसने दिली.
एसटी कर्मचाऱ्यांचे पीएफ व ग्रॅच्युईटीचे दोन स्वतंत्र ट्रस्ट असून 87 हजार एसटी कर्मचारी व अधिकारी यांची पीएफची अंदाजे 1240 कोटी रुपये व ग्रॅच्युईटीची अंदाजे 1105 कोटी रुपये इतकी रक्कम अशी मिळून अंदाजे 2345 कोटी रुपयांची रक्कम फेब्रुवारी 2024 पासून एसटीने दोन्ही ट्रस्टकडे भरणा केलेली नाही. कर्मचाऱ्यांच्या वेतनातून कपात केलेली पीएफची रक्कम पीएफ ट्रस्टकडे भरणा केली जाते व ट्रस्ट ही रक्कम गुंतवणूक करते. त्यावरील येणाऱ्या व्याजातून कर्मचाऱ्यांना निवृत्तीनंतर सदरची रक्कम 8.25 टक्के इतक्या दराने परत करण्यात येते, पण गेले अनेक महिने एसटीने सदरची रक्कम गुंतवणूक केली नसल्याचे त्यावरील व्याज व चक्रवाढ व्याज बुडाले असून त्याचा फटका कर्मचाऱ्यांना बसणार आहे.
नियमांची पायमल्ली
संपानंतर शासनाने नेमलेल्या त्रिसदस्यीय समितीने कर्मचाऱ्यांच्या वेतनाला लागणारी पूर्ण रक्कम राज्य सरकारकडून एसटीला देण्यात येईल असे शपथपत्र न्यायालयात दिले आहे, पण त्यानंतर कधीही पूर्ण रक्कम देण्यात आलेली नाही. परिणामी पीएफ ट्रस्ट अडचणीत सापडली आहे. ईपीएफओ ऑफिसने काही नियम, अटी व शर्ती घालून सदर ट्रस्टला मान्यता दिली असून त्यांनी घालून दिलेल्या नियमांची पायमल्ली होत आहे. ईपीएफओने ट्रस्टवर कारवाई केल्यास कर्मचाऱ्यांचे नुकसान होऊ शकते.
