विमानाच्या पंख्यामध्ये गवत अडकल्याने मुंबईहून बँकॉकला जाणाऱ्या एअर इंडियाच्या विमानाचे पाच तासाहून अधिक उशिराने उड्डाण झाले. विमानाचे पंख साफ करतानाच विमानतळ कर्मचाऱ्यांचा व्हिडिओ सोशल मीडियावर व्हायरल झाला आहे. विमान खोळंबल्याने प्रवाशांना नाहक त्रास झाला.
एअर इंडियाचे एआय2354 हे विमान नियोजित वेळेनुसार शुक्रवारी सकाळी 7.45 वाजता मुंबई आंतरराष्ट्रीय विमानतळावरून उड्डाण घेणार होते. मात्र विमानाच्या डाव्या बाजूच्या पंख्यात गवत अडकले होते. यामुळे पाच तासांहून अधिक काळ विमान मुंबई विमानतळावरच थांबवण्यात आले होते. विमानाच्या पंख्यातून गवत साफ केल्यानंतर दुपारी 1 वाजता विमानाने उड्डाण केले.
विमानाच्या पंख्यात समस्या आढळल्यानंतर सर्व प्रवाशांना तात्काळ बाहेर पडण्यास सांगण्यास आले. एअरलाईन कंपनीकडून प्रवाशांना नाश्त्याची व्यवस्था करण्यात आली. एअरलाइनने तात्काळ ही समस्या सोडवत विमानाच्या उड्डाणाला परवानगी दिली.
