पंढरपूरला दर्शनासाठी निघालेल्या वारकऱ्यांना अडवून कोयत्याचा धाक दाखवत लुटमार करण्यासह एका अल्पवयीन मुलीवर अत्याचार केल्याप्रकरणातील दोघा आरोपींना पुणे ग्रामीण पोलिसांनी अटक केली. 30 जून रोजी दौंड भागातील स्वामी चिंचोली येथे ही घटना घडली होती.
आमिर पठाण (30) आणि विकास सातपुते (28) अशी अटक केलेल्यांची नावे आहेत. दुचाकीवरून आलेल्या दोघांनी टेम्पोतील महिलांच्या डोळ्यांत मिरची पूड फेकून दागिने हिसकावून घेतले. गोंधळाचा फायदा घेत एकाने मुलीवर अत्याचार केला. पुणे ग्रामीणचे पोलीस अधीक्षक संदीप सिंह गिल यांनी दहा पथके तयार केली होती. आरोपींची स्केचेस तयार करून संशयित गुन्हेगारांची चौकशी करण्यात आली. यानंतर तांत्रिक तपासावरून दोघांना अटक केली.
