म्हाडाच्या कोकण मंडळातर्फे ठाणे शहर आणि जिल्हा तसेच वसई येथील 5285 घरे तसेच सिंधुदुर्ग जिह्यातील ओरोस, कुळगाव-बदलापूर येथील 77 भूखंडांच्या विक्रीकरिता अर्ज नोंदणी व अर्ज भरणा प्रक्रियेचा शुभारंभ सोमवारी करण्यात आला. या लॉटरीत कल्याण तिसगाव येथे अत्यल्प उत्पन्न गटासाठी असलेल्या घराची किंमत 9 लाख 55 हजार रुपये आहे तर लॉटरीतील सर्वात महागडे घर ठाण्यातील बाळकूम येथे आहे. मध्यम उत्पन्न गटासाठी असलेल्या या घराची किंमत 84 लाख 85 हजार रुपये आहे.
या सोडतीसाठी ऑनलाईन अर्ज करण्याची मुदत 13 ऑगस्ट रोजी रात्री 11.59 वाजेपर्यंत आहे तर अर्जदार अनामत रकमेचा भरणा 14 ऑगस्ट रोजी रात्री 11.59 वाजेपर्यंत ऑनलाईन करू शकतील. स्वीकृत अर्जाची अंतिम यादी 1 सप्टेंबर रोजी सायंकाळी 6 वाजता ‘म्हाडा’च्या https://housing.mhada.gov.in या संकेतस्थळावर प्रसिद्ध केली जाणार आहे. 3 सप्टेंबर रोजी सकाळी 10 वाजता संगणकीय सोडत ठाणे येथील डॉ. काशीनाथ घाणेकर नाट्यगृह येथे होणार आहे.
