गणपतीपाठोपाठ घरोघरी आज गौराई विराजमान झाली. राज्यभरात गौरी आगमनाचा उत्साह दिसून आला. ‘गवर आली सोन्याच्या पावलांनी… गवर आली माणिक मोतीच्या पावलांनी’ असे म्हणत पारंपरिक पद्धतीने लाडक्या गौरींची प्रतिष्ठापना करण्यात आली. कोकण, विदर्भ, मराठवाडा अशा विविध भागांत गौरींचे वाजतगाजत आगमन झाले. कुठे खडय़ाच्या गौरी, तर कुठे धान्याच्या राशीवर गौरींचे मुखवटे, तर कुठे तेरडय़ाची रोपे आणून गौरी बसवण्यात आल्या. उद्या सोमवारी ज्येष्ठ गौरींचे पूजन होईल. यानिमित्त गौराईला पंचपक्वान्नांचा नैवैद्य दाखवण्यात येईल.
