नाटक, चित्रपट, शास्त्रीय संगीत, वाद्यनिर्मिती, लावणी, दशावतार, झाडीपट्टी, भारूड, खडीगंमत, नमन- खेळे अशा कलेच्या विविध क्षेत्रांत प्रदीर्घ सेवा करणाऱ्या कलावंतांना राज्य सांस्कृतिक पुरस्काराने सन्मानित करण्यात येते. यंदाच्या 2024-25 या वर्षीच्या राज्य सांस्कृतिक पुरस्कारांची घोषणा शुक्रवारी झाली.
ज्येष्ठ अभिनेता अरुण कदम, गायक धनंजय जोशी आणि उदय भवाळकर, ढोलकी वादक विजय चव्हाण, दिग्दर्शक शिवाजी लोटन पाटील, नृत्यदिग्दर्शक सुभाष नकाशे , लावणी नृत्यांगना शकुंतला नगरकर आदी अनेक कलावंतांना ज्येष्ठ पुरस्कार मिळाला आहे. युवा पुरस्कार तेजश्री प्रधान, भूषण कडू, मधुरा वेलणकर, शंतनु रोडे, गायक राहुल देशपांडे, मेघना एरंडे, समीरा गुजर आदी अनेक कलावंतांना घोषित झाला आहे.
ज्येष्ठ पुरस्कार तीन लाख रुपये, युवा पुरस्कार प्रत्येकी एक लाख रुपये, मानचिन्ह, सन्मानपत्र असे या पुरस्कारांचे स्वरूप आहे. लवकरच हे पुरस्कार मुंबई येथे सर्व कलाकारांना प्रदान करण्यात येणार आहेत.
खंडूराज गायकवाड यांनाही पुरस्कार जाहीर
लोककला क्षेत्रातील भरीव आणि सातत्यपूर्ण कार्याची दखल घेत महाराष्ट्र शासनाच्या सांस्कृतिक कार्य विभागाने मंत्रालयातील ज्येष्ठ पत्रकार खंडूराज गायकवाड यांना राज्य सांस्कृतिक पुरस्कार जाहीर केला आहे. गेल्या वीस वर्षांहून अधिक काळ लोककलावंतांच्या विविध प्रश्नांवर सातत्याने कार्य करणारे गायकवाड हे लोककला व तमाशा परंपरेचे अभ्यासक म्हणूनही ओळखले जातात. प्रयोगात्मक कलेतील त्यांच्या योगदानाबद्दल सांस्कृतिक कार्य विभागाने त्यांचा सन्मान करण्याचा निर्णय घेतला आहे. राज्यातील लोककलावंत अनुदान शिफारस समितीवर त्यांनी प्रभावीपणे काम केले आहे.
