दादर येथील छत्रपती शिवाजी महाराज मैदान परिसरात अनधिकृतपणे लोखंडी स्ट्रक्चर उभारून होर्डिंग लावल्याप्रकरणी फौजदारी गुन्हा दाखल करण्यात आला आहे. जाहिरातदार अभिषेक चव्हाण यांच्यावर ही कारवाई करण्यात आली. पालिकेकडून पहिल्यांदाच असा फौजदारी गुन्हा दाखल करण्यात आला आहे. पालिकेच्या ‘जी उत्तर’ प्रशासकीय विभागाकडून याप्रकरणी पोलिसांत तक्रार देण्यात आली होती.
छत्रपती शिवाजी महाराज मैदान येथील प्रवेशद्वार क्रमांक-5 च्या दोन्ही बाजूंना महानगरपालिकेची परवानगी न घेता अनधिकृतपणे होर्डिंग लावण्यात आले होते. सुमारे 20 बाय 20 फूट आकाराच्या या फलकासाठी दोन्ही ठिकाणी लोखंडी संरचनादेखील उभारण्यात आली होती. यासंदर्भात, ‘जी उत्तर’ प्रशासकीय विभागाकडून संबंधित जाहिरातदार अभिषेक चव्हाण यांना 29 जानेवारी रोजी लेखी नोटीस बजावून अनधिकृत जाहिरात फलक आणि लोखंडी संरचना तत्काळ हटवण्याची सूचना देण्यात आली होती. तरीदेखील होर्डिंग आणि लोखंडी संरचना न हटवल्यामुळे त्यांच्याविरोधात 30 जानेवारी रोजी शिवाजी पार्क पोलीस ठाण्यात तक्रार नोंदविण्यात आली. तसेच अनधिकृत जाहिरात फलकांविरोधात निष्कासनाची कारवाई नियमितपणे सुरूच राहील, असे पालिकेने स्पष्ट केले आहे.
जाहिरातदारांनी अनधिकृतपणे होर्डिंग लावून विद्रुपीकरण करू नये. अन्यथा संबंधितांवर कठोर कायदेशीर कारवाई करण्यात येईल. याप्रकरणी कोणतीही हयगय न करता कारवाई केली जाईल. – विनायक विसपुते, सहाय्यक आयुक्त
अशी झाली कारवाई
सार्वजनिक मालमत्तेचे विद्रुपीकरण केल्याप्रकरणी महाराष्ट्र राज्य सार्वजनिक मालमत्ता विद्रुपीकरण कायदा, बृहन्मुंबई महानगरपालिका अधिनियम 1888 च्या कलम 3 व 4 आणि भारतीय न्याय संहितेच्या कलम 223, सह कलम 328, 471 अन्वये ही कारवाई करण्यात आली.
तसेच ‘जी उत्तर’ प्रशासकीय विभागातील अनुज्ञापन विभागाच्या अधिकारी-कर्मचाऱयांनी निष्कासनाची कारवाई करत सदर फलक आणि लोखंडी संरचनेचे साहित्य जप्त केले.
